అబద్ధం తాలూకు గొప్పతనమేంటో 'లై' టీజర్‌లోనే చెప్పేశాడు దర్శకుడు. శ్రీకృష్ణుడు కూడా కురుక్షేత్ర మహా సంగ్రామంలో అబద్ధం తోడుగానే విజయం సాధించాడు. 'అశ్వద్ధామ హతః' అని గ్యాప్‌ ఇచ్చి ఆ తర్వాత 'కుంజర' అనడమే కురుక్షేత్ర మహా సంగ్రామంలో హైలైట్‌ పాయింట్‌. దాన్ని టీజర్‌లో పొందుపరిచి 'లై' సినిమా టీజర్‌ని సూపర్‌ హిట్‌ చేశారు. సినిమా ఎంత స్టయిలిష్‌గా రూపొందిందో ఈ టీజర్‌ చూస్తే అర్థమవుతుంది. టీజర్‌తోనే వందకి వంద మార్కులు సాధించేసినట్లుగా ఉంది. డైరెక్టర్‌ విజన్‌, ఇంటెలిజెన్స్‌ ఏంటో ఈ టీజర్‌ చూస్తుంటేనే అర్ధమవుతోంది. నితిన్‌కి పవన్‌ కళ్యాణ్‌ అంటే చాలా ఇష్టమని తెలిసిందే. అందుకే ఇందులోనూ పవన్‌ని విడిచి పెట్టలేదు నితిన్‌. మక్కీకి మక్కీ పవన్‌ స్టైల్‌నీ, మేనరిజమ్‌ని దించేశాడు. నితిన్‌ సరసన మేఘా ఆకాష్‌ హీరోయిన్‌గా నటిస్తోంది ఈ సినిమాలో. విలన్‌ పాత్రలో సీనియర్‌ నటుడు అర్జున్‌ నటిస్తుండడం గమనించదగ్గ అంశం. ఫస్ట్‌లుక్స్‌తోనే సినిమాపై అంచనాలు పెంచేశాడు నితిన్‌. ఇక టీజర్‌ వచ్చినాక ఆ అంచనాలు వందలు, వేల రెట్టింపయ్యాయి. సినిమాపై ఓ అంచనాకి వచ్చేశారు నితిన్‌ అభిమానులు. హను రాఘవపూడి డైరెక్షన్‌లో ఈ సినిమా తెరకెక్కుతోంది. చాలా రిచ్‌గా సినిమాని తెరకెక్కించాడనీ టీజర్‌ చూస్తుంటే తెలుస్తోంది. టీజర్‌లోనే ఇంత చూపిస్తే, ఇక సినిమాలో ఇంకెంత చూపించి ఉంటాడో అంటూ సర్వత్రా క్యూరియాసిటీ నెలకొంది.
