త్రివిక్రమ్‌ శ్రీనివాస్‌ - పవన్‌ కళ్యాణ్‌ నిర్మాణంలో ఓ సినిమా తెరకెక్కుతోన్న సంగతి తెలిసిందే. ఇందులో నితిన్‌ హీరో. నితిన్‌ అంటే పవన్‌కి ఎంతో ఇష్టం. అలాగే నితిన్‌, పవన్‌కి వీరాభిమాని. అలాగే పవన్‌, త్రివిక్రమ్‌లు మంచి స్నేహితులు. ఈ ఇద్దరూ కలిసి నితిన్‌తో చేయబోయే సినిమా కోసం ఓ టైటిల్‌ని ఫిక్స్‌ చేశారు. అదే 'అక్కడ అబ్బాయి ఇక్కడ అమ్మాయి'. ఏంటీ ఈ టైటిల్‌ విన్నట్లుంది అనుకుంటున్నారా? అదేనండి పవన్‌ తొలి సినిమా 'అక్కడ అమ్మాయి ఇక్కడ అబ్బాయి'ని రివర్స్‌ చేసి త్రివిక్రమ్‌ ఈ సినిమాకి పెట్టబోతున్నాడు. తాజాగా నితిన్‌ కోసం ఈ టైటిల్‌ని త్రివిక్రమ్‌ రిజిస్టర్‌ చేయించాడు. ఈ టైటిల్‌తో నితిన్‌ ఫుల్‌ సేటిస్‌ఫై అయ్యాడు. సినిమా ఇక బ్లాక్‌ బస్టర్‌ కావడం పక్కా అనే నమ్మకంతో ఉన్నాడు నితిన్‌. కృష్ణ చైతన్య ఈ సినిమాకి దర్శకత్వం వహిస్తారు. ఇంతవరకూ పవన్‌ కళ్యాణ్‌ని తన సినిమా ఫంక్షన్స్‌కి ఆహ్వానించి, సక్సెస్‌లు అందుకున్నాడు నితిన్‌. ఈ సారి అలా కాదు. ఏకంగా పవన్‌ కళ్యాణ్‌ నిర్మాణంలోనే సినిమా చేసే అరుదైన అవకాశం కొట్టేశాడు. అందుకే నితిన్‌ ఆనందానికి అవధుల్లేకుండా పోయాయి. త్వరలోనే ఈ సినిమా సెట్స్‌ మీదికెళ్లనుంది. మరో పక్క నితిన్‌ 'కృష్ణ గాడి వీర ప్రేమగాధ' ఫేం హను రాఘవపూడి సినిమాలో నటిస్తున్నాడు. 'అ, ఆ..' సూపర్‌ సక్సెస్‌ తర్వాత నితిన్‌ నుండి రాబోతున్న సినిమా ఇది. ఫీల్‌ గుడ్‌ ఎంటర్‌టైనర్‌గా ఈ సినిమా తెరకెక్కబోతోందటట. ఈ సినిమాలో నితిన్‌ కొంచెం కొత్తగా కనిపంచబోతున్నాడనీ తెలియ వస్తోంది.
