ఉప్పెన‌తో సంచ‌ల‌నం సృష్టించాడు బుచ్చిబాబు. అరంగేట్రంతోనే ద‌ర్శ‌కుడిగా అద‌ర‌గొట్టాడు. సుకుమార్‌కి త‌గిన శిష్యుడు అనిపించుకున్నాడు. ఆ వెంట‌నే ఎన్టీఆర్‌కి క‌థ చెప్పి ఒప్పించాడు. అదే.. `పెద్ది`. ఇదో స్పోర్ట్స్ డ్రామా. మైత్రీ మూవీస్ ఈ సినిమాని భారీ బ‌డ్జెట్ తో తెర‌కెక్కించ‌డానికి రెడీ అయ్యింది.ఎన్టీఆర్‌కీ క‌థ న‌చ్చ‌డంతో.. అతి త్వ‌ర‌లో ఈ ప్రాజెక్టు ప‌ట్టాలెక్కుతుంద‌నుకున్నారు. అయితే ఎన్టీఆర్ వ‌రుస ప్రాజెక్టుల్లో ప‌డిపోయాడు. ఆర్‌.ఆర్‌.ఆర్ అవ్వ‌గానే కొర‌టాల సినిమాకి గ్రీన్ సిగ్న‌ల్ ఇచ్చాడు. ఇప్పుడు ప్రశాంత్ నీల్ చేరిపోయాడు. 2023లో ప్ర‌శాంత్ నీల్ సినిమా మొద‌ల‌వుతుంది. ఈలోగా కొర‌టాల సినిమా పూర్తి చేస్తాడు. అంటే.. ఎన్టీఆర్ మ‌ళ్లీ ఖాళీ అవ్వ‌డానికి 2024 ప‌డుతుంది. మ‌రి అంత వ‌ర‌కూ.. బుచ్చిబాబు సంగ‌తేంట‌న్న‌ది ప్ర‌ధాన‌మైన ప్ర‌శ్న‌.

కొర‌టాల సినిమాకీ, ప్ర‌శాంత్ నీల్ సినిమాకి మ‌ధ్య గ్యాప్ ఉంటే.. బుచ్చిబాబు సినిమాని ఎక్కించొచ్చు. కానీ.. దానికి కూడా అవ‌కాశాలు అంతంత మాత్ర‌మే. బుచ్చిబాబు ఈసారి పెద్ద స్పాన్ ఉన్న క‌థ రాసుకున్నాడు. క‌నీసం 10 నెల‌లైనా మేకింగ్ కి పెట్టాల్సిందే. రెండు సినిమాల మ‌ధ్య దీన్ని ఎడ్జెస్ట్ చేయ‌డం కుద‌ర‌ని ప‌ని. పోనీ.. స‌మాంత‌రంగా సినిమాని పూర్తి చేయాల‌న్నా... గెట‌ప్పులు మారిపోతాయి. కాబ‌ట్టి.. బుచ్చి ఇంకొంత కాలం వెయిట్ చేయాల్సిందే. ఈలోగా.. మ‌రో చిన్న క‌థ సెట‌ప్ చేసుకోవ‌డం మిన‌హా బుచ్చి బాబు ద‌గ్గ‌ర మ‌రో మార్గం లేదు.