ఎన్టీఆర్, రామ్ చ‌ర‌ణ్‌ల `ఆర్‌.ఆర్‌.ఆర్‌` మార్చి 25న విడుద‌ల అవుతోంది. ఈ సినిమా షూటింగ్ ఎప్పుడో పూర్త‌యింది. ప్ర‌మోష‌న్లు కూడా మొద‌లెట్టి, రిలీజ్ డేట్ వాయిదా ప‌డ‌డం వ‌ల్ల ఆపేశారు. ఈ షూటింగ్ నుంచి బ‌య‌ట‌కు వ‌చ్చి, రామ్ చ‌ర‌ణ్ శంక‌ర్ సినిమాతో బిజీ అయ్యాడు. అయితే ఎన్టీఆర్ కొత్తగా సినిమాలేం మొద‌లెట్ట‌లేదు. ఎన్టీఆర్ చేతిలో కొర‌టాల శివ సినిమా ఉంది. ఈ వారంలోనే ఈసినిమా సెట్స్‌పైకి వెళ్ల‌బోతోంది. ఈనెల 7న ఈ సినిమాని లాంఛ‌నంగా ప్రారంభిస్తార‌ని స‌మాచారం. క‌థానాయిక‌గా అలియా భ‌ట్ దాదాపుగా ఖాయ‌మైంది. త్వ‌ర‌లోనే అధికారిక ప్ర‌క‌ట‌న రాబోతోంది.
అయితే ఈ లోగా ఈ సినిమాకి సంబంధించిన ఓ ఆస‌క్తిక‌ర‌మైన వార్త బ‌య‌ట‌కు వ‌చ్చింది. ఇది అట‌వీ నేప‌థ్యంలో సాగే క‌థ అని, అడ‌వుల్ని ర‌క్షించ‌డానికి ఓ యువ‌కుడు చేసే ప్ర‌య‌త్న‌మ‌ని తెలుస్తోంది. ఈ సినిమాకి `రుద్ర` అనే టైటిల్ అనుకుంటున్నార్ట. అన్ని భాష‌ల్లోనూ ఇదే టైటిల్ తో సినిమాని విడుద‌ల చేస్తార‌ని స‌మాచారం. ఈ చిత్రంలో ప్ర‌తినాయ‌కుడి పాత్ర కోసం అన్వేష‌ణ జ‌రుగుతోంది. ఓ ప్ర‌ముఖ క‌థానాయ‌కుడు విల‌న్ గా న‌టిస్తార‌ని ప్ర‌చారం జ‌రుగుతోంది. ఆ వివ‌రాలు కూడా బ‌య‌ట‌కు రావాల్సివుంది.
