ఎన్టీఆర్ - కొర‌టాల శివ కాంబినేష‌న్‌లో ఓ సినిమా రూపుదిద్దుకుంటోంది. ఆర్.ఆర్.ఆర్ త‌ర‌వాత.. ఎన్టీఆర్ చేయ‌బోయే సినిమా ఇదే. ఈ సినిమాకి సంబంధించిన కాన్సెప్ట్ పోస్టర్, ప్రీ లుక్ కూడా బ‌య‌ట‌కు వ‌చ్చేశాయి. ఓ డైలాగ్ కూడా వినిపించారు. అయితే.. ఇది ఎన్టీఆర్ కోసం రాసుకున్న క‌థ కాదు. బ‌న్నీ కోసం రెడీ చేసిన స్క్రిప్టు అనే కామెంట్లు వినిపిస్తున్నాయి.
పుష్ఫ‌కంటే ముందు.. బ‌న్నీ - కొర‌టాల కాంబినేష‌న్‌లో ఓ సినిమా సెట్ట‌య్యింది. దానికి సంబంధించిన అఫీషియ‌ల్ పోస్టర్ కూడా బ‌య‌ట‌కు వ‌చ్చింది. ఓ న‌ది ఒడ్డు.. ప‌డ‌వ‌లు, అటువైపు ఫ్యాక్ట‌రీలూ.. ఇలా కాన్సెప్ట్ అంతా ఆ పోస్ట‌ర్‌లోనే చెప్పే ప్ర‌య‌త్నం చేశాడు. ఎందుక‌నో ఆ ప్రాజెక్టు ప‌ట్టాలెక్క‌లేదు. కొర‌టాల మాత్రం `బ‌న్నీ కోసం రాసిన క‌థ అలానే ఉంది. ఆ సినిమాని త‌ప్పకుండా ప‌ట్టాలెక్కిస్తాం` అని న‌మ్మ‌కంగా చెబుతున్నాడు. తీరా చూస్తే.. ఎన్టీఆర్ - కొర‌టాల సినిమా కాన్సెప్ట్ అదే అన్న‌ట్టుంది. ఆ కెర‌టాలు, తీరం, ప‌డ‌వ‌లు.. ఇవ‌న్నీ - బ‌న్నీ సినిమా కాన్సెప్ట్ ని గుర్తుకు తెస్తున్నాయి. దాంతో అల్లు అర్జున్ అభిమానులు కూడా `నో డౌట్.. ఇది బ‌న్నీ కోసం రాసుకున్న క‌థే` అని ధీమాగా చెబుతున్నారు. బ‌న్నీ క‌థ ఎన్టీఆర్ తో తీస్తున్నారంటే.. బ‌న్నీ - కొర‌టాల సినిమా లేన‌ట్టే.. అనే కామెంట్లు వినిపిస్తున్నాయి.
