ఆ మధ్య కొంచెం సన్నబడ్డ మంచు మనోజ్‌ ఇప్పుడెందుకు లావెక్కాడు? అనే ప్రశ్నకి సమాధానంగా 'ఒక్కడు మిగిలాడు' సినిమా గురించి చెప్పాడాయన. ఆ 'ఒక్కడు మిగిలాడు' సినిమా దేని మీదనో తెలుసా? ఎల్‌టిటిఈ మీద. లిబరేషన్‌ టైగర్స్‌ ఆఫ్‌ తమిళ ఈళం (ఎల్‌టిటిఇ)ని స్థాపించి ప్రపంచ వ్యాప్తంగా వార్తల్లో వ్యక్తి అయిన ప్రభాకరన్‌ పాత్రలో మంచు మనోజ్‌ నటిస్తున్నట్లున్నాడు. ఈ సినిమా తాజా లుక్‌ విడుదలైంది. 1990 ఎల్‌టిటిఇ చీఫ్‌ అని పేర్కొంటూ ఫస్ట్‌ లుక్‌ని విడుదల చేశారు. కెరీర్‌లో సక్సెస్‌ ఫెయిల్యూర్‌ ఎలా ఉన్నప్పటికీ విలక్షణమైన చిత్రాలు ఎంచుకోవడంలో తనదైన ప్రత్యేకతను చాటుకుంటున్నాడు మంచు మనోజ్‌. ఈ మధ్యనే 'గుంటూరోడు' చిత్రంలో నటించిన మనోజ్‌, ఈసారి ఎల్‌టిటిఇ చీఫ్‌ పాత్రలో 'ఒక్కడు మిగిలాడు' అనే సినిమాతో ప్రేక్షకుల ముందుకు రాబోతున్నాడు. ఈ సినిమా కోసం బాగా లావెక్కాడు. లావెక్కితే ఎక్కాడుగానీ తన పాత్రకు పూర్తి న్యాయం చేసేలా ఉన్నాడు. ఈ తరం జనాలకి ప్రభాకరన్‌ గురించి తెలియదు. శ్రీలంక ప్రభుత్వానికి వ్యతిరేకంగా తమిళుల హక్కుల కోసం ఉద్యమించారు ప్రభాకరన్‌. ఏదేమైనా ఈ చారిత్రక చిత్రం మనోజ్‌ కెరీర్‌లో ప్రత్యేకమైనదిగా భావించవలసి ఉంటుందనడం నిస్సందేహం. కమర్షియల్‌ చిత్రాలు ఎంచుకుని స్టార్‌డమ్‌ సొంతం చేసుకోవాలనుకోకుండా, విలక్షణ చిత్రాలను ఎంచుకుంటున్న మనోజ్‌ని అభినందించితీరాలి.