వెంకటేష్‌ కొత్త సినిమా 'గురు'లోని తొలి పాట విడుదలైంది. ఓ సక్కనోడా.. అంటూ సాగే ఈ పాటను వెంకటేష్‌ తన ఫేస్‌ బుక్‌ అకౌంట్‌ ద్వారా విడుదల చేశారు. సుధా కొంగర దర్శకత్వంలో తెరకెక్కుతోన్న ఈ చిత్రం ఫిబ్రవరిలో విడుదల కావాల్సి ఉంది. కానీ కొన్ని కారణాల వల్ల ఆలస్యం అవుతోంది. బాలీవుడ్‌లో విజయం సాధించిన 'సాలా ఖదూస్‌' సినిమాకి తెలుగు రీమేకే ఈ సినిమా. ఈ సినిమాలో వెంకటేష్‌ బాక్సింగ్‌ కోచ్‌గా నటిస్తున్నారు. రితికా సింగ్‌ ప్రధాన పాత్రలో నటిస్తోంది. మాతృకలో పోషించిన పాత్రనే రితికా సింగ్‌ ఈ సినిమాలోనూ పోషిస్తోంది. కాగా ఈ సినిమాలో వెంకటేష్‌ చాలా డిఫరెంట్‌ లుక్‌లో కనిపిస్తున్నాడు. హిందీలో మాధవన్‌ పోషించిన ఈ పాత్ర, ఇక్కడ తెలుగులో వెంకీకి కరెక్టుగా సూటయ్యిందంటున్నారు. అంతేకాదు ఈ సినిమా కోసం వెంకీ కొంచెం ఒళ్లు చేశాడు. బాగా కండలు పెంచాడు కూడా. హిందీలో ఘన విజయం సాధించిన ఈ చిత్రానికి తెలుగులో కూడా మంచి ఆదరణ లభిస్తుందని ఆశిస్తున్నారు. ఇటీవల విడుదలైన టీజర్‌ మంచి రెస్పాన్స్‌ అందుకుంటోంది. వెంకీ ఓ మ్యూజిక్‌ని హమ్‌ చేస్తున్నట్లుగా ఉన్న ఆ టీజర్‌ ఫ్యాన్స్‌ని బాగా ఎట్రాక్ట్‌ చేస్తోంది. తాజాగా విడుదలైన పాట మరింత ఆకట్టుకుంటోంది. ఈ సినిమాని మార్చిలో ప్రేక్షకుల ముందుకు తీసుకొచ్చేందుకు సన్నాహాలు చేస్తోంది చిత్ర యూనిట్‌.