'అజ్ఞాతవాసి' సినిమా ఆడియో రిలీజ్‌ ఫంక్షన్‌ ఈ రోజు సాయంత్రం జరగనున్న సంగతి తెలిసిందే. అయితే ఇంతవరకూ ఈ ఆడియో ఫంక్షన్‌ని చాలా సింపుల్‌గా నిర్వహించనున్నారనే ప్రచారం జరిగింది. కానీ అందులో ఎంత మాత్రమూ నిజం లేదు. ఆడియో ఫంక్షన్‌ని చాలా ఘనంగా నిర్వహిస్తున్నారు. ఏర్పాట్లు అదరిపోయేలా చేస్తున్నారు. 

ఇంతవరకూ టాలీవుడ్‌ సినీ పరిశ్రమలో ఏ సినిమాకీ జరగనంత ఘనంగా ఈ ఆడియో ఫంక్షన్‌కి ఏర్పాట్లు చేస్తున్నారు. భారీ ఎల్‌ఈడీ స్క్రీన్స్‌ ఏర్పాటు చేశారు. గెస్ట్‌గా ఎవరు విచ్చేయనున్నారన్న దానిపై ఇంకా సస్పెన్స్‌ కొనసాగుతూనే ఉంది. ఇంతవరకూ ప్రీ రిలీజ్‌ బిజినెస్‌లో 'బాహుబలి' సినిమానే టాప్‌. అయితే ఆ టాప్‌ నెంబర్‌ని 'అజ్ఞాతవాసి' దాటేసింది. అమెరికాలో రికార్డు సంఖ్యలోని ధియేటర్స్‌లో ఈ సినిమాని విడుదల చేస్తున్నారు. పవన్‌ కళ్యాణ్‌ - త్రివిక్రమ్‌ కాంబోకి ఉన్న క్రేజ్‌ ఓ పక్క. ఈ సినిమా పవన్‌కి 25వ సినిమా కావడం మరో విశేషం. సో ఈ సినిమా ప్రమోషన్స్‌ విషయంలో భారీగానే ఆలోచిస్తోంది చిత్ర యూనిట్‌. ఆడియో ఫంక్షన్‌ ఏర్పాట్లతోనే ఆ విషయం స్పష్టమవుతోంది. 

సినీ పరిశ్రమ నుండి పలువురు ఘనా పాటీలు ఈ ఈవెంట్‌కి హాజరు కానున్నారనీ తెలుస్తోంది. అలాగే ఈవెంట్‌లో కొన్ని ప్రత్యేక కార్యక్రమాలు కూడా ఉన్నాయట. స్పెషల్‌ డాన్సులు, స్పెషల్‌ లైవ్‌ షోలు ఉన్నాయట. ఈ ఈవెంట్‌ కోసం ప్రత్యేకంగా డాన్సర్స్‌ని తీసుకొచ్చారట. హారికా హాసినీ క్రియేషన్స్‌ బ్యానర్‌లో ఈ చిత్రాన్ని రాధాక్రిష్ణ నిర్మిస్తున్నారు. ఇండియన్‌ సినిమా మార్కెట్‌ స్థాయిని పెంచిన సినిమాగా ఇంతవరకూ 'బాహుబలి' చిత్రాన్ని చెప్పుకున్నాం. అయితే ఆ స్థాయిని ఇప్పుడు 'అజ్ఞాతవాసి' అధిగమించనుందని ట్రేడ్‌ పండితులు అంచనా వేస్తున్నారు. టీజర్‌కి ఒక్క రోజులోనే రికార్డు స్థాయిలో వ్యూస్‌ వచ్చాయి. 

ఇక ఆడియో ఫంక్షన్‌లో సినిమాకి సంబంధించిన ఇంకెన్ని ఆప్‌డేట్స్‌ రివీల్‌ కానున్నాయోననీ అభిమానులు ఆశక్తిగా ఎదురు చూస్తున్నారు.