ప్ర‌భాస్ - నాగ అశ్విన్ కాంబోలో సినిమా అన‌గానే... ఎన్నో వార్త‌లు బ‌య‌ట‌కు వ‌చ్చేశాయి. ఇది పాతాళ భైర‌విలాంటి సినిమా అని కొందరు చెబితే.. కాదు కాదు సైన్స్ ఫిక్ష‌న్ అని ఇంకొంద‌రు డంకా బ‌నాయించారు. స్టెరాయిడ్స్ నేప‌థ్యంలో న‌డిచే సినిమా అని మ‌రో ప్ర‌చారం. ఆదిత్య 369 త‌ర‌హా సినిమా ఇద‌ని మ‌రో ప్ర‌చారం మొద‌లైంది. నంద‌మూరి బాల‌కృష్ణ - సింగీతం శ్రీ‌నివాస‌రావు కాంబినేష‌న్‌లో వ‌చ్చిన‌ ఆదిత్య 369 చిత్రాన్ని ఎవ్వ‌రూ మ‌ర్చిపోలేరు. భూత‌, భ‌విష్య‌త్, వ‌ర్త‌మాన కాల‌ల‌కు చెందిన క‌థ ఇది.

ఈ చిత్రానికి సీక్వెల్ చేయాల‌ని బాలయ్య ఎప్ప‌టి నుంచో ప్ర‌య‌త్నిస్తున్నారు. బాల‌య్య వందో సినిమాగా ఆదిత్య 999 వ‌స్తుంద‌ని భావించారు. కానీ అది జ‌ర‌గ‌లేదు. అయితే ప్ర‌భాస్ సినిమా క‌థ ఆదిత్య 369 కి ద‌గ్గ‌ర‌గా ఉంటుంద‌ని చెప్పుకుంటున్నారు. కానీ ఈ వార్తల్లో నిజం లేద‌ని తెలుస్తోంది. ఆదిత్య 369కీ.. ప్ర‌భాస్ సినిమాకీ ఎలాంటి సంబంధం లేద‌ని, ఇది సైన్స్ ఫిక్ష‌నే అయినా, ఇప్ప‌టి వ‌ర‌కూ ఇలాంటి జోన‌ర్‌లో ఓ క‌థ రాలేద‌ని చెబుతున్నారు. ఈ సినిమాలో యాక్ష‌న్‌కి అధిక ప్రాధాన్యం ఉంద‌ట‌. ఈ యేడాది న‌వంబ‌రులో షూటింగ్ మొద‌లు కానుంది. 2022లో విడుద‌ల అవుతుంది.