ఇదేంటీ ఈ పేరు వింటే ఇదేదో అమ్మాయి పేరు అనుకుంటున్నారా? అయితే తప్పులో కాలేసినట్లే. ఒక్క నిముషం ఆగండి. కమెడియన్‌ 30 ఇయర్స్‌ ఇండస్ట్రీ పృధ్వీరాజ్‌ పేరు ఇది. సాయిధరమ్‌ తేజ హీరోగా నటిస్తున్న 'విన్నర్‌' సినిమాలో 'సింగమ్‌ సుజాత' అనే పాత్రలో కనిపించబోతున్నారు పృధ్వీ. పోలీస్‌ గెటప్‌లో సింగం సినిమా తరహాలో అతన్ని చూపించబోతున్నారు. బాయిలింగ్‌ స్టార్‌ బబ్లూ, ఫ్యూచర్‌ స్టార్‌ సిద్దప్ప, బత్తాయి బాబ్జీ ఇలా ఎన్నో విలక్షణమైన పాత్రలతో తెలుగు తెరపై స్టార్‌ కమెడియన్‌ అయ్యాడు పృధ్వీ రాజ్‌. ఏ పాత్ర వేసినా ఆ పాత్రలో పరకాయ ప్రవేశం చేసి ప్రేక్షకుల్ని కడుపుబ్బ నవ్విస్తూ ఉంటాడు. ఆయన ఉన్న సినిమాలో ఆయన కోసం ఓ ప్రత్యేక పాత్ర రెడీగా ఉంటుంది. స్టార్‌ హీరోల క్యారెక్టర్స్‌ని స్పూఫ్‌లు చేసి తనదైన శైలిలో ఆ పాత్రకి కామెడీని అద్ది, ఎంటర్‌టైన్‌ చేస్తారు పృద్వీ. తాజాగా 'విన్నర్‌' సినిమాలో సింగమ్‌ సుజాత పాత్రలో కామెడీతో చెలరేగిపోతాడట పృద్వీ. ఈ నెల 24న ప్రేక్షకుల ముందుకు రానుంది 'విన్నర్‌'. రకుల్‌ ప్రీత్‌ సింగ్‌ హీరోయిన్‌గా నటిస్తోన్న ఈ సినిమాకి గోపీచంద్‌ మలినేని దర్శకుడు. నల్లమలుపు బుజ్జి, ఠాగూర్‌ మధు ఈ చిత్రానికి నిర్మాతలు. థమన్‌ సంగీతం ఇప్పటికే సూపర్‌ హిట్‌ అయ్యింది. అనసూయ ఐటమ్‌ సాంగ్‌లో చిందులేయడం, యాంకర్‌ సుమ ఆ పాటకి వాయిస్‌ ఇవ్వడం ఈ సినిమాకి అదనపు ఆకర్షణ.
