పవర్‌స్టార్‌ పవన్‌కళ్యాణ్‌ పుట్టినరోజు నేడు. ఈ సందర్భంగా పవన్‌కళ్యాణ్‌, త్రివిక్రమ్‌ కాంబినేషన్‌లో తెరకెక్కుతోన్న కొత్త సినిమాకి సంబంధించిన మ్యూజిక్‌ టీజర్‌ని విడుదల చేశారు. సంగీత దర్శకుడు అనిరుద్‌ ఓ పాట పాడుతుండగా, దాన్ని పక్కనే కూర్చుని ఎంజాయ్‌ చేస్తున్నాడు దర్శకుడు త్రివిక్రమ్‌ శ్రీనివాస్‌. పాట అలా అలా సాగుతూ ఉంటుంది. అద్భుతమైన లిరిక్స్‌తో, ఇంకా అందమైన మ్యూజిక్‌తో సూపర్బ్‌ సాంగ్‌ నడుస్తుండగా, అప్పుడే పవన్‌కళ్యాణ్‌ ఎంట్రీ ఇస్తాడు. సినిమాలోని ఓ సీన్‌కి సంబంధించిన బిట్‌ అది. పవన్‌ అలా నిల్చుని ఉంటాడు, పక్కన ఓ కుర్చీ తిరుగుతుంటుంది. ఆ బ్యాక్‌గ్రౌండ్‌ మ్యూజిక్‌, ఆ మూడ్‌, ఆ లైటింగ్‌ అన్నీ కలిసి ఓ రేంజ్‌లో సెట్‌ అయ్యాయి. ఇలాంటి సీన్స్‌ని క్రియేట్‌ చేయడంలో త్రివిక్రమ్‌ శ్రీనివాస్‌ రూటే సెపరేటు. త్రివిక్రమ్‌ క్రియేషన్‌కి, పవన్‌ ఎలివేషన్‌ తోడైతే ఆ కిక్కే వేరప్పా! మ్యూజిక్‌ టీజర్‌ అంతా ఒక ఎత్తు, చివర్లో పవన్‌కళ్యాణ్‌ ఎంట్రీ ఒక ఎత్తు. పవన్‌కళ్యాణ్‌ 'పవర్‌' ఏంటో బాగా తెలిసిన వ్యక్తి త్రివిక్రమ్‌ శ్రీనివాస్‌. అందుకేనేమో 'లాస్ట్‌ పంచ్‌ మనదైతే ఆ కిక్కే వేరప్పా' అని పవన్‌తో చెప్పించాడు 'అత్తారింటికి దారేది' సినిమాలో ఈ విలక్షణ దర్శకుడు. ఏదేమైనా పవన్‌కళ్యాణ్‌ తన అభిమానులకి తన పుట్టినరోజునాడు అద్భుతమైన కానుక ఇచ్చేశాడు. ఇంకో వైపున ఓ పోస్టర్‌ని కూడా విడుదల చేశారు. అది కాన్సెప్ట్‌ పోస్టర్‌. 'కాన్సెప్ట్‌'ని ఎవరికి తోచిన రీతిలో వారు అర్థం చేసుకుంటున్నార్లెండి. దటీజ్‌ త్రివిక్రమ్‌ - పవన్‌!