టీజర్‌ ప్రీ లుక్‌ వీడియోతోనే 'రోగ్‌' సినిమాలో ఏముంటుందో ఓ ఐడియా ఇచ్చేశాడు దర్శకుడు పూరి జగన్నాథ్‌. దానికన్నా ముందు ఫస్ట్‌ లుక్‌ పోస్టర్‌తోనే పూరి కొత్తదనంతో కూడిన చిత్రమనే సంకేతాలు పంపాడు. ఆ అంచనాలకు ఏమాత్రం తగ్గకుండా ఉంది తాజాగా విడుదలైన టీజర్‌. పూరి సినిమాల్లో ఏమేం ఉంటాయో, అన్నీ ఇందులో ఉన్నాయి. సెంటిమెంట్‌ టచ్‌ ఇచ్చాడు, యాక్షన్‌ దుమ్ము దులిపేశాడు, హీరోయిన్ల హాట్‌ అప్పీల్‌ కన్పించేలా చేశాడు, హీరో హీరోయిన్ల కెమిస్ట్రీ అదరగొట్టేశాడు. పూరి సినిమాల్లో హీరో ఎలా ఉంటాడో, అలాగే ఉన్నాడు ఇషాన్‌. హీరోయిన్లు కూడా అంతే. అన్నీ డోసుకు మించే ఉన్నాయి కాబట్టి, 'మరో చంటిగాడి ప్రేమకథ' అంటున్న 'రోగ్‌', అంతకు మించి ఉండేలాగానే కనిపిస్తోంది. బ్యాక్‌గ్రౌండ్‌ స్కోర్‌, మ్యూజిక్‌, సినిమాటోగ్రఫీ అన్నీ హైలైట్స్‌గానే చెప్పవచ్చు. టీజర్‌ రివ్యూ అని చెప్పుకోవాలంటే ఐదుకి ఐదు మార్కులే వేసెయ్యాలి. కొత్త హీరోని పరిచయం చేస్తున్న పూరి, ఆ హీరోకి ఎలాంటి క్వాలిటీస్‌ ఉంటే తొలి చిత్రంతో ప్రేక్షకుల మైండ్‌లో బలమైన ముద్ర వేయగలుగుతాడో, ఆ క్వాలిటీస్‌ అన్నీ ఇషాన్‌కి ఆపాదించేశాడు. సినిమాగా పూరి మేకింగ్‌ ఎలా ఉందో తెలియాలంటే మాత్రం ఫుల్‌ సినిమా వచ్చేదాకా వేచి చూడాలి. ఈలోగా పూరి, 'రోగ్‌' టీజర్‌తో సినిమాకి కావాల్సిన హైప్‌ తీసుకొచ్చేశాడని నిస్సందేహంగా చెప్పవచ్చు.