ముద్దుగుమ్మ రాశీఖన్నా 'ఊహలు గుసగుసలాడే' సినిమాతో ముద్దుగా, బొద్దుగా తెరంగేట్రం చేసింది. ఆ తర్వాత 'జోరు' సినిమాతో అమ్మడు జోరు ముదిరిందనుకున్నారు. ఆ వెంటనే గోపీచంద్‌ సినిమా 'జిల్‌'తో హిట్‌ కొట్టింది. అక్కడి నుండి వరసగా సినిమాలు చేసుకుంటూ పోతోంది ఈ బొద్దుగుమ్మ. తాజాగా ఈ ముద్దుగుమ్మ స్టార్‌ హీరోస్‌తో ఛాన్స్‌ కొట్టినట్లే కొట్టి, సస్పెన్స్‌లో పడుతోంది. మెగాపవర్‌ స్టార్‌ చరణ్‌తో నటించే ఛాన్స్‌ వచ్చిందని ఆ మధ్య వార్తలు వచ్చాయి. అందుకోసం ఏకంగా ఈ బొద్దుభామ బరువు తగ్గి, నాజూగ్గా తయారయిపోయింది. అయితే ఆ ఛాన్స్‌ తుస్సుమన్నదంటూ గాసిప్స్‌ వచ్చాయి. అలాగే ఎన్టీఆర్‌ తాజా చిత్రం 'జై లవ్‌ కుశ'లో కూడా ఈ అమ్మడు దాదాపు ఓకే అయ్యిందంటూ ప్రచారం జరిగింది. అయితే అది కూడా డౌటే అంటున్నారు. తాజాగా మాస్‌ రాజా రవితేజ సినిమా 'టచ్‌ చేసి చూడు' సినిమాలో రాశీఖన్నా హీరోయిన్‌గా ఎంపికైంది. గతంలో ఈ ముద్దుగుమ్మ రవితేజతో 'బెంగాల్‌ టైగర్‌' సినిమాలో నటించింది. ఆ సినిమా సూపర్‌ సక్సెస్‌ అయ్యింది. అందుకే రాశీఖన్నాని కావాలని ఎంచుకున్నాడట రవితేజ. ఈ సినిమా ఓకే అవడంతో అమ్మడికి మిస్‌ చేసుకున్న సినిమాలు కూడా మళ్లీ తన ముందుకు వస్తున్నాయంటూ గట్టిగా ప్రచారం నడుస్తోంది. అన్నట్లు గోపీచంద్‌తో 'ఆక్సిజన్‌' సినిమాలో కూడా ఈ ముద్దుగుమ్మే హీరోయిన్‌. ఒకవేళ ఈ భామ మిస్‌ చేసుకున్న ఆఫర్లు కూడా దక్కించుకుందంటే, ఈ దెబ్బతో రాశీఖన్నా దశ తిరిగినట్లే!