బైలింగ్వల్‌ మూవీ 'స్పైడర్‌' తర్వాత రకుల్‌ప్రీత్‌ సింగ్‌ టాలీవుడ్‌ తెరపై కనిపించలేదు. తెలుగులో ఆమె చేతిలో సినిమాలు కూడా లేవు. వరుస పెట్టి సినిమాలు చేసిన రకుల్‌ ప్రీత్‌సింగ్‌ బాలీవుడ్‌ పేరు చెప్పి, మొత్తానికి టాలీవుడ్‌కి టాటా చెప్పేసింది. ఇప్పుడు ఆమె కోరుకున్నా అవకాశాలు ఇవ్వలేని పరిస్థితిలో ఉంది టాలీవుడ్‌. 

ఇదిలా ఉండగా, తమిళంలో కార్తి హీరోగా తెరకెక్కుతోన్న సినిమాలో రకుల్‌ ప్రీత్‌ సింగ్‌ హీరోయిన్‌గా నటిస్తోన్న సంగతి తెలిసిందే. బాలీవుడ్‌లో 'అయ్యారీ' చిత్రానికి ముందే ఈ ముద్దుగుమ్మ ఈ ప్రాజెక్ట్‌పై సైన్‌ చేసింది. ఆ సినిమా ఈ రోజు లాంఛనంగా ప్రారంభమైంది. గంపెడు ఆశలతో బాలీవుడ్‌ బాట పట్టిన రకుల్‌ ప్రీత్‌ సింగ్‌కి ఘోర పరాజయం కలగడంతో గోడకి కొట్టిన బంతిలా సౌత్‌లో వచ్చి పడింది. అయితే ముందుగా ఒప్పుకున్న తమిళ ప్రాజెక్టులు తప్ప, తెలుగులో ఆమె చేతికి కొత్త ప్రాజెక్ట్‌ ఏదీ చిక్కకపోవడం విచారించదగ్గ విషయమే. 

తమిళంలో సూర్యతో ఓ సినిమాలోనూ, కార్తీతో ఓ సినిమాలోనూ నటిస్తోంది ప్రస్తుతం రకుల్‌ ప్రీత్‌సింగ్‌. సూర్య సినిమాలో రకుల్‌తో పాటు, కీర్తి సురేష్‌ కూడా నటిస్తోంది. కార్తీతో రకుల్‌ నటించబోయే చిత్రం పైనే ఆమె ఎక్కువ ఆశలు పెట్టుకుందట. ఎందుకంటే ఈ సినిమాలో రకుల్‌ సోలో హీరోయిన్‌ కావడమే అందుకు కారణం. కాగా కార్తితో రకుల్‌ గతంలో 'ఖాకీ' చిత్రంలో నటించింది. ఈ సినిమా తెలుగులో ఓకే అనిపించినా, తమిళంలో మంచి విజయాన్నే అందుకుంది. 

మరి ఈ తాజా చిత్రంతోనైనా రకుల్‌ సౌత్‌లో ఇదివరకటిలా బౌన్స్‌ బ్యాక్‌ అవుతుందేమో చూడాలి మరి. త్వరలోనే ఈ సినిమా రెగ్యులర్‌ షూటింగ్‌ స్టార్ట్‌ కానుందని చిత్ర యూనిట్‌ చెబుతోంది.