'నాన్నకు ప్రేమతో' సినిమాకిగాను ఉత్తమ నటిగా అవార్డ్‌ అందుకుంది ముద్దుగుమ్మ రకుల్‌ ప్రీత్‌ సింగ్‌. సైమా అవార్డుల వేడుకలో రకుల్‌ సెంటర్‌ ఆఫ్‌ ఎట్రాక్షన్‌గా నిలిచింది. 'నాన్నకు ప్రేమతో' తన కెరీర్‌లోనే వెరీ స్పెషల్‌ ఫిలిం అని రకుల్‌ ప్రీత్‌ సింగ్‌ పేర్కొంది. ఈ పురస్కారం నటిగా ఎంతో సంతృప్తినిచ్చిందనీ, అవార్డులు బాధ్యతను ఇంకా పెంచుతాయని చెప్పింది రకుల్‌. సుకుమార్‌ దర్శకత్వంలో ఎన్టీఆర్‌ హీరోగా వచ్చిన 'నాన్నకు ప్రేమతో' సినిమా పెద్ద విజయాన్ని అందుకుంది. ఈ సినిమాలో రకుల్‌ నటించిన పాత్రకు చాలా ప్రాధాన్యత ఎక్కువ. అంతేకాదు ఇంతకు ముందు వరకూ గ్లామర్‌ పాత్రలతో మాత్రమే ఆకట్టుకున్న రకుల్‌, ఈ సినిమాతో తొలిసారిగా నటనకి ప్రాధాన్యత ఉన్న పాత్రలో నటించి, తన సత్తా చాటింది. అలాగే ఈ సినిమాకి రకుల్‌ తెలుగు నేర్చేసుకుని, తన పాత్రకి తానే డబ్బింగ్‌ చెప్పుకుంది కూడా. చాలా అందంగా క్యూట్‌గా కనిపించింది ఈ సినిమాలో రకుల్‌. టాలీవుడ్‌లో ప్రస్తుతం రకుల్‌ ప్రీత్‌ సింగ్‌ నెంబర్‌ వన్‌ హీరోయిన్‌గా చెలామణీ అవుతోంది. అలాగే మోస్ట్‌ బిజీయెస్ట్‌ హీరోయిన్‌ కూడా. టాలీవుడ్‌ హీరోలందరికీ హీరోయిన్‌గా ఫస్ట్‌ ఆప్షన్‌ రకుల్‌ అంటే అతిశయోక్తి కాదు. లక్కీ గాళ్‌ రకుల్‌ ప్రీత్‌ సింగ్‌ ప్రస్తుతం మహేష్‌తో 'స్పైడర్‌' సినిమాలోనూ, బెల్లంకొండ శ్రీనివాస్‌తో 'జయ జానకీ నాయకా' సినిమాలోనూ నటిస్తోంది.