ఈనాటి హీరోల ఆలోచ‌న మారింది. చేతిలో ఓ సొంత బ్యాన‌ర్ ఉండాల్సిందే అనుకుంటున్నారు. అంతేకాదు... త‌మ సినిమాల‌న్నీ సొంత బ్యాన‌ర్‌లోనే చేసుకోవ‌డానికి మ‌క్కువ చూపిస్తున్నారు. మ‌హేష్ బాబుకి సొంత నిర్మాణ సంస్థ ఉంది. ఎన్టీఆర్ ఆర్ట్స్‌.. ఎన్టీఆర్ దే అనుకోవాలి. ఈమ‌ధ్య ర‌వితేజ కూడా నిర్మాణంలో కాలు పెట్టాడు. రామ్ చ‌ర‌ణ్ సైతం `కొణిదెల ప్రొడ‌క్ష‌న్స్‌` పేరుతో నిర్మాణ సంస్థ‌ని మొద‌లెట్టాడు. నిజానికి చిరంజీవి కోసం మొద‌లెట్టిన నిర్మాణ సంస్థ ఇది. చిరు సినిమాల‌న్నీ ఈ బ్యాన‌ర్ లోనే చేయాల‌న్న‌ది చ‌ర‌ణ్ ఆలోచ‌న‌. అయితే ఇప్పుడు త‌న సినిమాలు సైతం ఇందులోనే చేయాల‌ని నిర్ణ‌యించుకున్నాడు.

చ‌ర‌ణ్ ప్ర‌స్తుతం శంక‌ర్‌తో ఓ సినిమా చేస్తున్న సంగ‌తి తెలిసిందే. ఆ త‌ర‌వాతి సినిమా కూడా ఓకే అయిపోయింది. రామ్ చ‌ర‌ణ్ 16వ చిత్రానికి ద‌ర్శ‌కుడు ఫిక్స‌య్యాడు. జెర్సీ తో ఆక‌ట్టుకున్న గౌత‌మ్ తిన్న‌నూరి ద‌ర్శ‌కుడు. ఎన్వీ ప్ర‌సాద్ నిర్మాత‌. అయితే ఇప్పుడు ఈ చిత్ర నిర్మాణంలో చ‌ర‌ణ్ కూడా వాటా తీసుకుంటన్నాడు. త‌న కొణిదెల ప్రొడ‌క్ష‌న్స్ ని భాగ‌స్వామిగా మార్చాడు. త‌న పారితోషికం ప‌క్క‌న పెట్టి సినిమా లాభాల్లో వాటా తీసుకోబోతున్నాడు. ఇక మీద‌ట త‌న సినిమాల‌న్నీంటికీ ఇదే ఫార్ములా అనుస‌రించ‌బోతున్నాడ‌ట‌. శంక‌ర్ సినిమా పూర్త‌వ్వ‌గానే గౌత‌మ్ తిన్న‌నూరి సినిమా ప‌ట్టాలెక్కుతుంది. పూర్తి వివ‌రాలు త్వ‌ర‌లో తెలుస్తాయి.