రామ్‌చరణ్‌ కథానాయకుడిగా తెరకెక్కుతోన్న చిత్రం 'రంగస్థలమ్‌ 1985'. క్రియేటివ్‌ డైరెక్టర్‌ సుకుమార్‌ దర్శకత్వంలో తెరకెక్కుతోంది ఈ సినిమా. సమంత, రామ్‌ చరణ్‌తో జత కడుతోంది. కాగా ఈ సినిమా షూటింగ్‌ శరవేగంగా జరుగుతోన్న సంగతి తెలిసిందే. గోదావరి జిల్లా పరిసర ప్రాంతాల్లో ఎక్కువ భాగం ఈ సినిమా షూటింగ్‌ జరుపుకుంది. తాజాగా హైద్రాబాద్‌లో ఈ సినిమా కోసం ఓ భారీ సెట్‌ వేశారు. ప్రస్తుతం ఓ పాట చిత్రీకరణ జరుగుతోంది. దానికి సంబంధించిన ఓ ఫోటోని రామ్‌ చరణ్‌ సోషల్‌ మీడియాలో పోస్ట్‌ చేసి, 'రంగస్థలమ్‌'లో పండగ సందడి కొనసాగుతోంది అని రాశారు. దాంతో పాటు సాంగ్‌ డే అనే హ్యాష్‌ టాగ్‌ను జత చేశారు. అవును ఆ ఫోటో చూస్తే అలాగే ఉంది. పండగ వాతావరణం. రకరకాల దేవుళ్లతో పాటు రాక్షసుల గెటప్‌లు వేసుకున్న వ్యక్తులు. పులి వేష ధారులు కనిపిస్తున్నారు. ఇదంతా చూస్తుంటే పండగలానే ఉంది. ఈ సంక్రాంతి పండక్కి సినిమా ప్రేక్షకుల ముందుకు తీసుకొచ్చేందుకు చిత్ర యూనిట్‌ సన్నాహాలు చేస్తోంది. 1985 కాలం నాటి వాతావరణాన్ని ఈ సినిమా ద్వారా చూపించబోతున్నారు సుకుమార్‌. మైత్రీ మూవీస్‌ సంస్థ ఈ సినిమాని నిర్మిస్తోంది. రామ్‌ చరణ్‌ డిఫరెంట్‌ లుక్‌లో కనిపిస్తాడు ఈ సినిమాలో. 1985 కాలం నాటి అచ్చమైన పల్లెటూరి కుర్రోడిలా. సమంత కూడా పల్లెటూరి అమ్మాయి పాత్రలో కనిపించనుంది. బుల్లితెర ముద్దుగుమ్మ అనసూయ ఓ ముఖ్య పాత్రలో నటిస్తోంది. జగపతిబాబు తదితరులు ఇత ర ముఖ్య తారాగణం. దేవిశ్రీ ప్రసాద్‌ మ్యూజిక్‌ అందిస్తున్నారు.