'కిరిక్‌ పార్టీ' సినిమాతో స్టార్‌డమ్‌ అందుకున్న కన్నడ బ్యూటీ రష్మిక మండన్న, తెలుగులో తెరంగేట్రానికి అంతా సిద్ధమయ్యింది. మొదట్లో ఈ ముద్దుగుమ్మ తెరంగేట్రానికి చాలానే పబ్లిసిటీ చేసేశారు. తెరంగేట్రానికి ముందే బోలెడంత హడావిడి చేసేశారు ఈ ముద్దుగుమ్మ విషయంలో. అయితే ఈ ముద్దుగుమ్మ ఎవరితో జత కడుతోందంటారా? 'అర్జున్‌రెడ్డి'తో బంపర్‌ విక్టరీ కొట్టిన విజయ్‌ దేవరకొండతోనే. విజయ్‌ దేవరకొండ తదుపరి సినిమాలో రష్మిక హీరోయిన్‌గా ఎంపికైంది. గీతా ఆర్ట్స్‌ సంస్థ ఈ చిత్రాన్ని నిర్మిస్తోంది. 'సోలో', 'శ్రీరస్తు శుభమస్తు' తదితర చిత్రాల దర్శకుడు పరశురామ్‌ ఈ చిత్రాన్ని తెరకెక్కిస్తాడు. తెలుగులో తెరంగేట్రంపై రష్మిక కూడా క్లారిటీ ఇచ్చింది. తెలుగులో నటిస్తున్నందుకు ఆనందంగా ఉందనీ, ఈ అవకాశం ఇచ్చిన నిర్మాతలు అల్లు అరవింద్‌, బన్నీ వాసుకు థ్యాంక్స్‌ చెబుతున్నానని సోషల్‌ మీడియాలో పేర్కొంది. రష్మికని టాలీవుడ్‌కి స్వాగతం పలుకుతూ, 'కిర్రాక్‌ మ్యాజిక్‌' చేద్దామని విజయ్‌ దేవరకొండ సోషల్‌ మీడియాలో తెలిపాడు. దానికి ఆమె స్పందిస్తూ, 'ఖచ్చితంగా పండగ చేద్దాం' అని పేర్కొంది. 'పెళ్లిచూపులు' సినిమాతోనే కిర్రాక్‌ హిట్‌ కొట్టిన హీరో విజయ్‌ దేవరకొండకి 'అర్జున్‌రెడ్డి'తో వచ్చిన ఫాలోయింగ్‌ అంతా ఇంతా కాదు. దాంతో మనోడి తర్వాత సినిమాపై కూడా అంచనాలు భారీగానే ఉంటాయి. అలాంటి భారీ అంచనాల సినిమాలో రష్మిక ఫస్ట్‌ ఫస్ట్‌ నటించడం బంపర్‌ ఆఫర్‌ కాక ఇంకేంటి!