మాస్‌ రాజా రవితేజ స్పీడు పెంచాడు. ఇటీవల 'నేల టిక్కెట్టు' సినిమాతో ఆశించిన విజయం అందుకోలేకపోయాడు. అంతకు ముందు వచ్చిన 'టచ్‌ చేసి చూడు' సినిమాతో అస్సలు టచ్చే చేయలేకపోయాడు. అయినా కానీ జోరులో ఏమాత్రం స్పీడు తగ్గలేదు. ఫెయిల్యూర్స్‌ వచ్చినప్పుడే మరింత దూకుడు ప్రదర్శించాలన్న సిద్ధాంతంతో ముందుకెళ్తున్నట్లున్నాడు రవితేజ. 

ప్రస్తుతం శీను వైట్ల దర్శకత్వంలో 'అమర్‌ అక్బర్‌ ఆంటోనీ' చిత్రంలో నటిస్తున్న సంగతి తెలిసిందే. ఈ సినిమాలో రవితేజ త్రిపాత్రాభినయం చేస్తున్నాడు. త్రిపాత్రాభినయం అంటే ఏముంటుందిలే. ఓ అమాయకుడు, ఓ రౌడీ, ఓ తెలివైనోడు.. ఇంతేగా అనుకుంటే పప్పులో కాలేసినట్లే. మూడు పాత్రలూ ఇంతకు ముందెన్నడూ ఏ త్రిపాత్రాభినయ సినిమాలోనూ చూడని విభిన్న పాత్రలట. చాలా ఇంట్రెస్టింగ్‌గా శీను వైట్ల ఈ సినిమాని తెరకెక్కించబోతున్నాడు. 

ఈ మధ్య శీను వైట్లకు కూడా సక్సెస్‌లు లేవు. అయితే శీనువైట్ల - రవితేజ కాంబినేషన్‌కి బెస్ట్‌ కాంబోగా మంచి పేరుంది. ఆ పేరును మరోసారి నిరూపించుకునే దిశగా ఈ కాంబో రంగం సిద్ధం చేస్తోందట. శరవేగంగా ఈ చిత్రం షూటింగ్‌ జరుగుతోంది. కాగా రవితేజ మరో సినిమానీ లైన్‌లో పెట్టేశాడు. అదే 'డిస్కో రాజా'. 

ఈ చిత్రంలో కూడా రవితేజ ఒక్కడు కాదు, ఇద్దరట. అదేనండీ డబుల్‌ రోల్‌ పోషిస్తున్నాడట. అంటే రవితేజ స్పీడు ఏ రేంజ్‌లో ఉందో చూశారుగా. ఒక్కొక్క పాత్రలో కాదు, డబుల్‌, ట్రిపుల్‌ ధమాకాతో ఎట్రాక్ట్‌ చేయనున్నాడన్న మాట.