రవితేజ అంటేనే మాస్‌. మాస్‌ రాజ్యానికి మకుటం లేని మహారాజు మాస్‌ రాజా రవితేజ. గతేడాది మొత్తం రవితేజ సినిమాలకు దూరంగా ఉన్నాడు. ఈ ఏడాదే రేస్‌లోకి వచ్చాడు. వస్తూ వస్తూనే 'రాజా ది గ్రేట్‌' సినిమాతో నిజంగానే మాస్‌ రాజా ది గ్రేట్‌ అనిపించుకున్నాడు. లాంగ్‌ గ్యాప్‌ తర్వాత వచ్చినా, అదీ ఓ ప్రయోగాత్మక చిత్రమైనా ఈ గ్యాప్‌ తన ఇమేజ్‌కి ఏమాత్రం డ్యామేజ్‌ కాలేదని ప్రూవ్‌ చేశాడు. అంధుడిగా నటించి, నవ్వులు పూయించాడు. ప్రేక్షకుల ముఖచిత్రంలో తన ముఖ చిత్రం బాగానే ముద్రించుకున్నాడు. 

త్వరలోనే 'టచ్‌ చేసి చూడు' సినిమాతో ప్రేక్షకుల ముందుకు రానున్నాడు రవితేజ. ఇది పక్కా మాస్‌ ఎంటర్‌టైనర్‌. విక్రమ్‌ సిరికొండ ఈ చిత్రాన్ని తెరకెక్కిస్తున్నారు. తాజాగా ఈ చిత్రం ఫస్ట్‌లుక్‌ విడుదలైంది. ఈ లుక్‌లో చాలా స్టైలిష్‌గా ఉన్నాడు రవితేజ. 'గ్యాప్‌ తర్వాత వస్తున్నాడు.. స్టైలిష్‌గా కనిపిస్తున్నాడు.. అంటే క్లాస్‌ అనుకుంటున్నారేమో కానే కాదు పక్కా మాస్‌. పైకి క్లాస్‌గా కనిపించినా లోపల మాస్‌ అలాగే ఉందంటున్నాడు. ఆల్రెడీ ప్రూవ్‌ చేశాడు ఓ సినిమాతో. ఇప్పుడు మరోసారి ప్రూవ్‌ చేసుకోబోతున్నాడు. 

ఇంకెందుకాలస్యం వెయిట్‌ అండ్‌ సీ..త్వరలోనే వచ్చేస్తున్నాడు. ఫస్ట్‌లుక్‌ వచ్చాక సినిమాపై అంచనాలు పెరిగాయి. ఈ సినిమాలో ముద్దుగుమ్మ రాశీఖన్నా, రవితేజకి జోడీగా నటిస్తోంది. హాట్‌ బ్యూటీ సీరత్‌ కపూర్‌ ఓ ఇంపార్టెంట్‌ రోల్‌లో కనిపించనుంది. ఇకపోతే, వచ్చే ఏడాది నుండి ఇదివరకటిలాగే రవితేజ ఏడాదికి మూడు సినిమాలతో రానున్నాడట. ఇప్పటికే కథలు వింటున్నాడట. అయితే ఒక విషయం గమనించాలి. ఇకపై సరికొత్త కథలతో వస్తానంటున్నాడు మన మాస్‌ రాజా రవితేజ.