ఒక సినిమా విజయం సాధించిందని చెప్పడానికి కొలమానం ఒకటే. వినోదం పంచాలి, డబ్బులు రావాలి. ఆ రెండు వున్న సినిమా ఎఫ్2. హీరోలుగా వెంకటేష్, వరుణ్ లకు హిట్ ని ఇచ్చిన సినిమా. దర్శకుడిగా అనిల్ రావిపూడిని టాప్ లీగ్ లో చేర్చిన సినిమా. నిర్మాత దిల్ రాజు పై కాసుల వర్షం కురిపించిన సినిమా. టోటల్ గా ప్రేక్షకులని నవ్వుల్లో ముంచెత్తిన సినిమా.
తెలుగు ప్రేక్షకులకు అచ్చ తెలుగు సంక్రాంతి కానుకలా వచ్చిన ఈ సినిమా.. రెండు తెలుగు రాష్ట్రాల్లోనే కాకుండా .. అటు ఓవర్సీస్ ని కూడా ఆకట్టుకుంది. ఎఫ్ 2 గొప్ప కథ కాదు ఐతే ఫన్‌ క్యారెక్టర్స్‌ని, ఫన్నీ సిట్యువేషన్స్‌ని సృష్టించి వాటి చుట్టూ వినోదం పంచండంలో దర్శకుడు అనిల్ విజయం సాధించాడు. అంతేగా... అంతేగా మేన‌రిజం ఎప్ప‌టికీ గుర్తుండిపోతుంది. దేవిశ్రీ పాట‌లూ బాగానే క్లిక్ అయ్యాయి. సంక్రాంతికి ఏ తరహా వినోదాన్ని ప్రేక్షకులు కోరుకుంటారో అలాంటి వినోదాన్ని అందించిన ఎఫ్2.. 2019మొత్తానికి కమర్షియల్ గా హయ్యస్ట్ పే చేసిన సినిమాగా నిలిచింది. త్వ‌ర‌లోనే ఎఫ్ 3 తీయాల‌ని ప్లాన్ చేస్తున్నాడు అనిల్ రావిపూడి. అందులో మ‌రో హీరో కూడా క‌నిపించ‌బోతున్నాడు. మ‌రి ఆ హీరో ఎవ‌రో తెలియాలంటే ఇంకొంత కాలం ఆగాలి.
