కృష్ణవంశీ సినిమాల్లో హీరోయిన్లు చాలా అందంగా కనిపిస్తారన్న టాక్‌ ఉంది. కృష్ణవంశీ తాజా చిత్రం 'నక్ష్రత్రం'లో అందగత్తెల పోటీ మొదలైంది అందుకే. సందీప్‌ కిషన్‌, రెజీనా జంటగా తెరకెక్కుతోన్న ఈ చిత్రంలో చాలా మంది ఆర్టిస్టులే ఉన్నారు. వారిలో ముఖ్యంగా చెప్పుకోదగ్గది ముద్దుగుమ్మలు రెజీనా, ప్రగ్యా జైశ్వాల్‌. ఈ ఇద్దరూ పోటీ పడి తమ అందాలకు పని పెట్టారు. ఒకరు హీరోయిన్‌, మరొకరు గెస్ట్‌ రోల్‌ కాగా, ఇద్దరూ పోటా పోటీగా అందాల విందు చేశారంటే నమ్మండి. రెజీనా గ్లామర్‌ సంగతి తెలిసిందే. అయితే ఈ సినిమాలో కనిపించినంత గ్లామర్‌గా తన గత చిత్రాల్లో ఆమెను చూడలేదంటే ఆశ్చర్యపోనక్కర్లేదు. ట్రైలర్‌లోనే బోలెడంత గ్లామర్‌ ఒలకపోసేసింది ఈ ముద్దుగుమ్మ. అలాగే చాలా చలాకీ అయిన క్యారెక్టర్‌లా కనిపిస్తోంది రెజీనాది ఈ సినిమాలో. మరో భామ ప్రగ్యా జైశ్వాల్‌. 'కంచె' సినిమాతో క్లాసిక్‌ లుక్‌తో దర్శనమిచ్చి, అందరి మదిలోనూ అందమైన బొమ్మలా గుర్తుండిపోయింది ఈ ముద్దుగుమ్మ. అయితే ఈ సినిమాలో చాలా హాట్‌గా కనిపించింది. పోలీసాఫీసర్‌ పాత్రలో చాలా పవర్‌ ఫుల్‌గా కనిపిస్తూనే, గ్లామర్‌లో ఏమాత్రం తక్కువ కాదనిపించింది. అలాగే సీనియర్‌ హీరోయిన్‌ శ్రియ ఐటెం సాంగ్‌లో తళుక్కుమంది. మెగా మేనల్లుడు సాయిధరమ్‌ తేజ్‌ ఈ సినిమాలో మరో నక్ష్రత్రం, యంగ్‌ హీరో తనీష్‌ విలన్‌ పాత్రలో నటిస్తున్నాడు. ఇలా ఇన్ని నక్ష్రత్రాలతో కలర్‌ఫుల్‌గా ఉన్న ఈ సినిమా విడుదలయ్యాక ఎన్ని నక్షత్రాలు సాధిస్తుందో వేచి చూడాలి. త్వరలోనే ఈ సినిమా ప్రేక్షకుల ముందుకు రానుంది.
