సంచలన దర్శకుడు రామ్‌ గోపాల్‌ వర్మకు కరాటేలో ప్రావీణ్యం ఉందన్న సంగతి తెలిసిందే. విద్యార్ధి దశలోంచే కరాటేపై పట్టు సాధించాడు వర్మ. అప్పుడప్పుడూ దీనికి సంబంధించిన ఫోటోలు సోషల్‌ మీడియాలో పోస్ట్‌ చేస్తుంటాడు కూడా. అయితే తాజాగా ఓ సినిమా షూటింగ్‌ నిమిత్తం వర్మ కిక్‌ బాక్సింగ్‌లు చేస్తూ కనిపించాడు. ఈ వీడియో ఇప్పుడు సోషల్‌ మీడియాలో వైరల్‌ అయ్యింది. 

వర్మ ఇచ్చిన కిక్‌కి ప్రత్యర్ధులు కుయ్యో మొర్రో అంటూ నేల కూలారు. ఇదీ ఓ సినిమా షూటింగ్‌లో భాగంగా డైరెక్టర్‌గా వర్మ చేసి చూపించిన రిహార్సల్‌. దీని సంగతి పక్కన పెడితే, వర్మ ఏమీ అంత తేలిగ్గా సంచలన దర్శకుడు అయిపోలేదు. ఒకేసారి మూడు డిఫరెంట్‌ జోనర్స్‌ని తెరకెక్కిస్తున్నాడు రామ్‌ గోపాల్‌ వర్మ. ఈ మూడు జోనర్స్‌ దేనికవే విభిన్నమైనవి. అందులో ఒకటి చరిత్ర కాగా, మరోటి యాక్షన్‌, మూడోది పూర్తి భిన్నమైన పోర్న్‌ స్టార్‌తో తెరకెక్కిస్తున్న వీడియో 'జిఎస్‌టీ'. 

ఎన్టీఆర్‌ జీవిత చరిత్ర ఆధారంగా వర్మ తెరకెక్కిస్తున్న 'లక్ష్మీస్‌ ఎన్టీఆర్‌' చిత్రం స్టోరీ ప్రిపరేషన్‌లో ఉంది. నాగార్జునతో వర్మ తెరకెక్కిస్తున్న యాక్షన్‌ మూవీ ప్రస్తుతం షూటింగ్‌ దశలో ఉంది. ఇకపోతే ముచ్చటగా మూడోది పోర్న్‌ స్టార్‌ మియా మల్కోవాతో వర్మ రూపొందిస్తున్న వీడియో. విచిత్రమేంటంటే, వర్మ ముందుగా అనుకున్న ఎన్టీఆర్‌ బయోపిక్‌ వెనక్కి వెళ్లింది. ఆ తర్వాత వెలుగులోకి వచ్చిన నాగార్జున సినిమా. ప్రస్తుతం సెట్స్‌పై ఉంది. 

ఇవి రెండూ ఇలా ఉండగా, అనూహ్యంగా తెరపైకొచ్చిన పోర్న్‌ స్టార్‌ మియా మల్కోవా వీడియో 'గాడ్‌ సెక్స్‌ అండ్‌ ట్రూత్‌' మాత్రం చిత్రీకరణ పూర్తి చేసుకుని జనవరి 26న ప్రేక్షకుల ముందుకు వచ్చేస్తోంది. ఎంత క్రియేటివిటీ ఉన్నా మూడు డిఫరెంట్‌ జోనర్స్‌ని ఒకేసారి డీల్‌ చేయడమంటే మామూలు విషయం కాదు. అది వర్మకే చెల్లింది. అందుకే వర్మ అంటే ఓ సెన్సేషన్‌.. అదంతే!