మెగా హీరోల‌కూ, రాంగోపాల్ వ‌ర్మ‌కూ మ‌ధ్య‌... టామ్ అండ్ జెర్రీ ఆట న‌డుస్తూనే ఉంటుంది. మెగా హీరోలంటే... వ‌ర్మ‌కెందుకో ప్ర‌త్యేక‌మైన ఇంట్ర‌స్టు. వాళ్ల‌ని ఏదోలా కెలికి, వార్త‌ల్లో నిలుస్తుంటాడు. మెగా హీరోల్ని, న‌టుల్ని పొగుడుతూ ట్వీట్లు పెట్ట‌డం, వాళ్ల‌కు మ‌ద్ద‌తుగా మాట్లాడ‌డం వ‌ర్మ‌కి బొత్తిగా తెలీదు. కానీ... ఈసారెందుకో వ‌ర్మ మెగా సైడు నిలిచాడు.

ఇటీవ‌ల నాగ‌బాబు చేసిన `గాడ్సే` వ్యాఖ్య‌లు దుమారం రేపుతున్న సంగ‌తి తెలిసిందే. గాంధీని చంపిన గాడ్సేలో దేశ‌భ‌క్తుడు ఉన్న‌ట్టు నాగ‌బాబు చేసిన వ్యాఖ్య‌లు క‌ల‌క‌లం సృష్టిస్తున్నాయి. నాగ‌బాబుపై కొంత‌మంది పోలీసుల‌కు సైతం ఫిర్యాదు చేశారు. సోష‌ల్ మీడియా అంతా ఇదే చ‌ర్చ‌. అయితే ఇలాంట‌ప్పుడు నాగ‌బాబు సైడు మాట్లాడాడు వ‌ర్మ‌. నాగబాబు వ్యాఖ్య‌ల్లో పెద్ద‌గా త‌ప్పేం లేద‌ని చెప్పుకొచ్చాడు. అంతే కాదు.. గాడ్సే పై ఓ సినిమా కూడా చేస్తాన‌ని ప్ర‌కటించాడు.

వ‌ర్మ ఎప్పుడూ అంతే. ఎడ్డెం అంటే తెడ్డెం అంటాడు. అంద‌రూ నాగ‌బాబుని విమ‌ర్శిస్తుంటే.. వ‌ర్మ మాత్రం నాగ‌బాబుది రైటే అంటున్నాడు. వ‌ర్మ స్టైల్ అంతేగా. కాక‌పోతే... వ‌ర్మ త‌మ సైడుకి రావ‌డం మెగాఫ్యాన్స్‌కి షాక్‌కి గురి చేస్తోంది. మున్ముందు ఈ స‌పోర్టింగ్ ఎలా ఉంటుందో చూడాలి.