'లీడర్‌' సినిమాతో క్యూట్‌ అండ్‌ డిగ్నిటీగా ఎంట్రీ ఇచ్చింది బ్యూటీ రీచా గంగోపాధ్యాయ. తర్వాత రవితేజతో 'మిరప్‌కాయ్‌' నాగార్జునతో 'భాయ్' తదితర చిత్రాల్లో నటించింది. ప్రబాస్‌తో 'మిర్చి' సినిమాలో నటించాక అమ్మడు మళ్లీ సినిమాల్లో నటించింది లేదు. అయితే ఆ తర్వాత ఈ ముద్దుగుమ్మకి పెళ్లయిపోయిందంటూ, అందుకే సినిమాల్లో నటించడం లేదనీ గాసిప్స్‌ వచ్చాయి. 

అయితే గతంలో కూడా ఈ ముద్దుగుమ్మ సినిమాల్లో ఎందుకు నటించడం లేదంటే తాను ఉన్నత చదువులు నిమిత్తం విదేశాల్లో ఉన్నాననీ, ఇప్పట్లో సినిమాల్లో నటించే ఉద్దేశ్యం లేదనీ సోషల్‌ మీడియాలో తన ఫ్యాన్స్‌కి విన్నవించింది. అయినా కానీ ఈ ముద్దుగుమ్మపై గాసిప్స్‌ ఆగడం లేదు. తాజాగా పెళ్లి గాసిప్స్‌తో ఈ ముద్దుగుమ్మ మళ్లీ సోషల్‌ మీడియాలో స్పందించాల్సి వచ్చింది. ఈ సారి మాత్రం చాలా స్ట్రెయిట్‌గా క్లారిటీ ఇచ్చేసింది ఈ హాట్‌ బ్యూటీ. పెళ్లి చేసుకుంటే, అందరికీ చెప్పే చేసుకుంటాననీ, సీక్రెట్‌గా అస్సలు చేసుకోననీ చెప్పింది. అయినా పెళ్లి చేసుకోవడం ఏమీ తప్పుడు పని కాదు కదా. దర్జాగా అందరికీ చెప్పే చేసుకుంటాననీ ఈ ముద్దుగుమ్మ ఘాటుగా స్పందించింది. 

అంతేకాదు, తాను ప్రస్తుతం స్టడీస్‌ పైనే ఫోకస్‌ పెట్టాననీ, ఇంకా ఇప్పుడప్పుడే పెళ్లి చేసుకునే ఉద్దేశ్యం లేదనీ చెప్పింది. తాను లైఫ్‌లో సాధించాల్సిన లక్ష్యాలు చాలా ఉన్నాయనీ, ఎప్పుడు ఏ విషయంలో ఎలా స్పందించాలనే దానిపై తనకు పక్కాగా క్లారిటీ ఉందనీ ఈ ముద్దుగుమ్మ అంటోంది. సినిమాల్లో నటించడం మానేసినా కానీ, తనపై అభిమానం పెంచుకున్న కొంత మంది అభిమానుల కోసమే ఇలా ఈ స్పష్టత ఇస్తున్నాననీ, దయచేసి తన అభిమానులెవరూ ఇలాంటి గాసిప్స్‌ని నమ్మవద్దనీ ఈ ముద్దుగుమ్మ క్యూట్‌గా సెలవిచ్చేసింది.