తొలి సినిమా 'ఉయ్యాల జంపాల' నుంచి, ఇటీవల వచ్చిన 'రంగుల రాట్నం' సినిమా వరకూ కొత్త హీరోయిన్ల ఎంపికలో హీరో రాజ్‌ తరుణ్‌ ప్రత్యేకమైన శ్రద్ధ పెడుతూ వస్తున్నాడు. తన ప్రతి సినిమాకీ హీరోయిన్‌ విషయంలో కొత్తదనం వుండాలని రాజ్‌ తరుణ్‌ కోరుకుంటాడో, అతనితో సినిమాలు చేసే దర్శక నిర్మాతలే అలాంటి ఆలోచనలు చేస్తుంటారోగానీ, రాజ్‌తరుణ్‌ కొత్త సినిమా వస్తోందంటే, ఆ సినిమా ద్వారా పరిచయమయ్యే కొత్త భామ ఎవరట? అన్న ఉత్కంఠ నెలకొనడం సర్వసాధారణమైపోయింది. 

లేటెస్ట్‌గా రాజ్‌ తరుణ్‌ ఇంట్రడ్యూస్‌ చేయబోతోన్న కొత్త బ్యూటీ పేరు రిధి కుమార్‌. మోడలింగ్‌, అందాల పోటీల్లోంచి వెండి తెరకు పరిచయమవుతున్న ఈ బ్యూటీ, క్యూట్‌ ఎక్స్‌ప్రెషన్స్‌తో హాట్‌ ఫిజిక్‌తో ఆల్రెడీ సోషల్‌ మీడియా సెన్సేషన్‌ అయిపోయింది. ఆమె ఇన్‌స్ట్రాగ్రామ్‌ అకౌంట్‌ చూస్తే, హాటెక్కించే ఫొటోలకు కొదవే వుండదు. సో, తెలుగు తెరకు మరో హాట్‌ బ్యూటీ రాజ్‌ తరుణ్‌ 'లవర్‌'గా పరిచయం కాబోతోందన్నమాట. ఈ సినిమా టైటిల్‌ 'లవర్‌'. దిల్‌ రాజు ఈ చిత్రాన్ని నిర్మిస్తున్నారు. తొలి తెలుగు సినిమాతోనే సూపర్‌ హిట్‌ కొట్టాలనే తపనతో వుందట రిధి కుమార్‌. 

ఇదిలా వుంటే రాజ్‌తరుణ్‌ నటించిన 'రంగుల రాట్నం' సంక్రాంతికి విడుదలైంది, అంచనాల్ని అందుకోలేకపోయింది. రాజ్‌ తరుణ్‌ మరో చిత్రం 'రాజుగాడు' విడుదల కావాల్సి వుంది. ఈ సినిమాలో అందాల భామ అమైరా దస్తుర్‌ హీరోయిన్‌గా నటించింది. ఇటీవలే 'మనసుకు నచ్చింది' సినిమాతో అమైరా తెలుగు ప్రేక్షకుల్ని పలకరించిన విషయం విదితమే.