తెలుగమ్మాయిలు గ్లామర్‌కి దూరమనే మాట ఇప్పటిది కాదు. అయితే, ప్రస్తుతం నెలకొన్న పరిస్థితుల్లో మన తెలుగమ్మాయిలు కూడా పంథా మార్చేశారు. అవసరం అనుకుంటే, తామూ గ్లామర్‌కి సై అని నిరూపిస్తున్నారు. అయితే, రీతూ వర్మ మాత్రం అందుకు భిన్నంగా మాట్లాడుతోంది. అందంగా కనిపించడం వేరు, గ్లామర్‌గా కనిపించడం వేరు. గ్లామర్‌ పేరుతో హీరోయిన్స్‌ని ఎంత అసహ్యంగా చూపిస్తున్నారో చూస్తున్నాం. అలా మాత్రం తానెప్పుడూ కనిపించనని రీతూ వర్మ తెగేసి చెప్పేస్తోంది.
‘పెళ్లి చూపులు’ సినిమాతో సూపర్‌ హిట్‌ కొట్టిన ఈ ముద్దుగుమ్మ తర్వాత ‘కేశవ’ తదితర చిత్రాల్లో నటించింది. ఆ తర్వాత తమిళంలో అడుగు పెట్టింది. అక్కడ కూడా సెలెక్టివ్‌ మూవీసే చేస్తోంది. ఎప్పుడో సెట్స్‌ మీదికెళ్లిన ‘ధృవనక్షత్రం’ సినిమా స్టేటస్‌ ఏంటనేది ఇంతవరకూ తెలీదు. విక్రమ్‌ సరసన ఈ సినిమాలో రీతూ వర్మ నటిస్తోంది. ఇకపోతే, తాజాగా మళ్లీ తెలుగులోకి రీ ఎంట్రీ ఇచ్చిందీ పెళ్లిచూపులు బ్యూటీ. నాని హీరోగా రూపొందుతోన్న ‘టక్‌ జగదీష్‌’లో రీతూ వర్మ వన్‌ ఆఫ్‌ ది హీరోయిన్‌గా కనిపించనుంది. శివ నిర్వాణ ఈ సినిమాకి దర్శకుడు. పొలాచ్చిలో ఈ మధ్యనే తొలి షెడ్యూల్‌ షూటింగ్‌ పూర్తి చేసుకున్న ఈ సినిమా, రెండో షెడ్యూల్‌ రాజమండ్రి పరిసర ప్రాంతాల్లో జరుగుతోంది.
