తెలుగు సినిమా స్థాయిని, ఖ్యాతిని పెంచిన ద‌ర్శ‌కుడు రాజ‌మౌళి. తెలుగు సినిమాని పాన్ ఇండియా స్థాయికి తీసుకెళ్లాడాయ‌న‌. బాహుబ‌లి సినిమాతో దేశం మొత్తం టాలీవుడ్ వైపు చూసింది. ఇప్పుడు `ఆర్‌.ఆర్‌.ఆర్‌` కోసం కూడా అంతే ఆస‌క్తిగా ఎదురు చూస్తోంది. ఎన్టీఆర్ - రామ్ చ‌ర‌ణ్‌లు క‌లిసి చేస్తున్న మ‌ల్టీస్టార‌ర్ ఇది. అక్టోబ‌రు 13న ప్ర‌పంచ వ్యాప్తంగా విడుద‌ల కానుంది. ఈ సంద‌ర్భంగా ఆర్‌.ఆర్‌.ఆర్ మేకింగ్ వీడియోని విడుద‌ల చేసింది చిత్ర‌బృందం.

రాజ‌మౌళి ఆలోచ‌న‌లు, క‌థ‌లు అన్నీ హాలీవుడ్ స్థాయిలోనే ఉంటాయి. ఈ మేకింగ్ వీడియోలోనూ అదే క‌నిపించింది. భారీ సెట్లు, వేల‌ల్లో జూనియ‌ర్ ఆర్టిస్టులు, తుపాకులు ఇలా ఒక్క‌ట‌ని కాదు... ఈ మేకింగ్ వీడియోలో క‌నిపించిన ప్ర‌తీ ఫ్రేమ్‌... ఆర్‌.ఆర్‌.ఆర్‌పై అంచ‌నాల్ని భారీ స్థాయిలో పెంచేశాయి. ముఖ్యంగా కీర‌వాణి అందించిన బ్యాక్ గ్రౌండ్ స్కోర్ ఓ రేంజ్ లో ఉంది. మేకింగ్ వీడియోనే ఇలా ఉంటే... సినిమా ఇంకెలా ఉంటుందో అన్న ఆశ‌లు, అంచ‌నాలూ పెరిగిపోయాయి. ఈ సినిమా కోసం రాజ‌మౌళి, చ‌ర‌ణ్‌, ఎన్టీఆర్‌లు ప‌డిన క‌ష్టం అంతా ఇందులో క‌నిపించింది. క‌చ్చితంగా.. బాహుబ‌లి రేంజ్ లో వ‌సూళ్ల వ‌ర్షం కురిపిస్తుంద‌న్న న‌మ్మ‌కం క‌లిగింది. ప్ర‌స్తుతం సోష‌ల్ మీడియాలో ఈ మేకింగ్ వీడియోనే హ‌ల్ చ‌ల్ చేస్తోంది.