అదేంటి ఇప్పుడిప్పుడే కెరీర్‌లో దూసుకెళ్తోన్న సాయి పల్లవి పెళ్లి చేసుకుంటోందా? అని ఆశ్చర్యపోకండి. సాయిపల్లవి తమిళంలో నటించిన 'కరు' చిత్రం, తెలుగులో 'కణం' పేరుతో విడుదలవుతోన్న సంగతి తెలిసిందే. ఈ సినిమాలో యంగ్‌ స్టార్‌ నాగశౌర్య హీరోగా నటిస్తున్నాడు. ఈ సినిమా నుండి ఓ పాటను తాజాగా విడుదల చేసింది చిత్ర యూనిట్‌. 

'సంజాలీ..' అంటూ సాగే ఆ పాటలో సాయిపల్లవి, నాగశౌర్య పెళ్లి దుస్తుల్లో అందంగా కనిపిస్తున్న స్టిల్స్‌ ఆకట్టుకుంటున్నాయి. పెళ్లి దుస్తుల్లో సాయి పల్లవి, నాగశౌర్య చుట్టూ బంధుమిత్రుల కోలాహలంతో ఈ స్టిల్స్‌ చూసేందుకు చాలా బాగున్నాయి. నేచురల్‌ అప్పీల్‌నిస్తున్నాయి. విజయ్‌ దర్శకత్వంలో తెరకెక్కుతోన్న ఈ సినిమా త్వరలోనే ప్రేక్షకుల ముందుకు రానుంది. తొలి చిత్రంతోనే సాయి పల్లవి యూత్‌ మనసు దోచేసింది. యూత్‌తో పాటు, పక్కింటమ్మాయిలా కనిపించడంతో ఫ్యామిలీ ఆడియన్స్‌ మనసును కూడా కొల్లగొట్టేసిందీ బ్యూటీ. 

యాక్టింగ్‌లో ఈ తరం ముద్దుగుమ్మల్లో టాప్‌ లేపేసింది. ఏ సినిమా పడితే ఆ సినిమాకి సాయి పల్లవి సైన్‌ చేయదు. కథ నచ్చాలి. ఆ కథలో తన పాత్ర నచ్చితేనే ఆ సినిమాకి ఓకే చెబుతుంది. యంగ్‌ హీరోలు సాయి పల్లవితో సినిమాలు చేసేందుకు క్యూ కడుతున్నారు. తొలి సినిమాకే మెగా కాంపౌండ్‌ నుండి మెగా ఎంట్రీ ఇచ్చిన సాయి పల్లవికి ప్రస్తుతం ఉన్న క్రేజ్‌ అంతా ఇంతా కాదు. 

నానితో నటించిన రెండో మూవీ 'ఎంసీఏ'తో కూడా హిట్‌ కొట్టేసిన ఈ బ్యూటీ ఇప్పుడు నాగశౌర్యకి లక్‌ అందించేందుకు రెడీ అవుతోంది 'కణం' సినిమాతో. ఆల్రెడీ నాగశౌర్య 'ఛలో' సినిమాతో సక్సెస్‌ అందుకున్నాడు. డబ్బింగ్‌ సినిమా అయినా కానీ 'కణం'తో లక్కీ బ్యూటీ సాయి పల్లవి రూపంలో నాగశౌర్య మరో సక్సెస్‌ని తన ఖాతాలో వేసుకుంటాడో లేదో చూడాలి మరి.