`అర్జున్ రెడ్డి` సినిమాతో టాలీవుడ్ లోకి గ్రాండ్ ఎంట్రీ ఇచ్చాడు సందీప్ రెడ్డి వంగా. ఒక్క సినిమాతోనే స్టార్ డైరెక్ట‌ర్ అయిపోయాడు. అదే క‌థ‌ని బాలీవుడ్ కి తీసుకెళ్లి, అక్క‌డా సూప‌ర్ హిట్ కొట్టాడు. ఇప్పుడు సందీప్ అంటే.. ఓ పాన్ ఇండియా డైరెక్ట‌ర్‌. త్వ‌ర‌లోనే ర‌ణ‌బీర్ క‌పూర్‌తో ఓ సినిమా చేస్తున్నాడు సందీప్‌. దీనికి `డెవిల్‌` అనే పేరు కూడా ఖాయం చేశారు.

ఇంత‌లోనే ఏమైందో.. ఈ సినిమా టైటిల్ ని `యానిమ‌ల్‌`గా మార్చిన‌ట్టు తెలుస్తోంది. ఇదో మాఫియా డాన్ క‌థ అని, స్మ‌గ్లింగ్ నేప‌థ్యంలో సాగుతుంద‌ని తెలుస్తోంది. సందీప్ ద‌గ్గ‌ర `షుగ‌ర్ ఫ్యాక్ట‌రీ` అనే క‌థ ఉంది. అది కూడా స్మ‌గ్లింగ్ క‌థే. దాన్ని తెలుగులో ఓ సూప‌ర్ స్టార్ తో చేయాల‌ని భావించాడు. కానీ... ఈ క‌థ మ‌న‌వాళ్లెవ‌రికీ ఎక్క‌లేదు. దాంతో పాటు ఏ స్టార్ హీరో ఇప్పుడు ఖాళీగా లేడు. అందుకే ఈ క‌థ‌నే అటూ ఇటూ మార్చి, బాలీవుడ్ లో తీస్తున్నాడ‌ని ప్ర‌చారం జ‌రుగుతోంది. 2021 ప్రారంభంలోనే ఈ బాలీవుడ్ మూవీ సెట్స్‌పైకి వెళ్లే ఛాన్సుంది.