అర్జున్‌ అంటే, అల్లు అర్జున్‌ కాదు. ఈయన తమిళ నటుడు అర్జున్‌. తెలుగులో అల్లు అర్జున్‌తో 'నా పేరు సూర్య నా ఇల్లు ఇండియా' సినిమాలో నటించిన సీనియర్‌ నటుడు అర్జున్‌, చాలా తెలుగు సినిమాల్లో కనిపించిన సంగతి తెల్సిందే. ఆయనపై ఓ హీరోయిన్‌ 'మీ..టూ..' అంటూ లైంగిక వేధింపుల ఆరోపణలు చేసింది. 

ఆమె కన్నడ హీరోయిన్‌. పేరు శృతి. శృతిహాసన్‌ కాదు, ఈ శృతి అసలు పేరు శృతి హరిహరన్‌. ఓ సినిమా షూటింగ్‌ సమయంలో తనతో అర్జున్‌ అసభ్యకరంగా ప్రవర్తించాడనే ఆరోపణలు చేసింది ఈ హీరోయిన్‌. 2016లో జరిగిందట ఈ ఘటన. అర్జున్‌ జుగుప్సాకరంగా తన శరీరాన్ని తడిమేస్తోంటే, తాను చాలా బాధపడినప్పటికీ ఆ విషయాన్ని బయటపెట్టలేకపోయాననీ, తన సమస్యను ఆ సమయంలో దర్శకుడు గుర్తించాడని చెప్పింది ఈ హీరోయిన్‌. 

బాలీవుడ్‌ నుంచి సౌత్‌ సినిమా వరకు 'మీ..టూ..' ఉద్యమ ప్రకంపనలు కనిపిస్తున్న ఈ నేపథ్యంలో తన వాయిస్‌ని వినిపించడం ద్వారా ఇన్నేళ్ళపాటు తన గుండెల్లో దాచుకున్న బాధను బయటపెట్టగలిగానని శృతి హరిహరన్‌ అంటోంది. ఇప్పటివరకు తమిళ సినీ ప్రముఖుల్లో ఓ రచయిత మాత్రమే 'మీ..టూ..' ఆరోపణల్ని ఎదుర్కొన్నారు. గాయని, డబ్బింగ్‌ ఆర్టిస్ట్‌ చిన్మయి ఆయననపై ఆరోపణలు చేసింది. అయితే శ్రీరెడ్డి, తెలుగుతోపాటు తమిళ సినీ ప్రముఖులపైనా లైంగిక వేధింపులు - కాస్టింగ్‌ కౌచ్‌ ఆరోపణలు చేసిన సంగతి తెలుసు కదా.