బ్యాడ్మింటన్‌ సంచలనం పి.వి.సింధు బయోపిక్‌ తెరకెక్కించబోతున్నారు. బ్యాడ్మింటన్‌ కోర్టులో హోరా హోరీగా ఆడి దేశానికి సిల్వర్‌ పతకం సాధించి పెట్టింది పి.వి.సింధు. అందుకే ఆమె పడిన కష్టానికి దృశ్య రూపం ఇవ్వాలనే ఉద్దేశ్యంతో బాలీవుడ్‌లో చర్చలు జరుగుతున్నాయి. గత ఏడెనిమిది నెలలుగా ఈ సినిమాపై చర్చలు జరుగుతున్నాయి. ప్రముఖ నటుడు సోనూ సూద్‌ ఈ సినిమాకి నిర్మాతగా వ్యవహరించనున్నాడట. ఈ విషయాన్ని ఆయనే స్వయంగా వెల్లడించారు. విలన్‌గా, క్యారెక్టర్‌ ఆర్టిస్టుగా పలు చిత్రాల్లో నటించిన సోనూ సూద్‌ హిందీలో ప్రభుదేవా, తమన్నా జంటగా నటించిన 'తూతకు తూతకు తూతియా' సినిమాతో నిర్మాతగా మారారు. ఈ సినిమా తెలుగులో 'అభినేత్రి' పేరుతో విడుదలైంది. ఈ సారి చేయబోయే సినిమా బయోపిక్‌ అయితే బాగుంటుందని భావించాడట సోనూ సూద్‌. ఈ సినిమాలో సింధు పాత్రలో ఎవరు నటిస్తారనేది ప్రస్తుతానికి సస్పెన్సే. త్వరలోనే పూర్తి వివరాలు వెల్లడి కానున్నాయి. ప్రస్తుతం బయోపిక్స్‌ ట్రెండ్‌ బాగా నడుస్తోంది. మరో బ్యాడ్మింటన్‌ సంచలనం గోపీచంద్‌ బయోపిక్‌ని తెరకెక్కించడానికి ప్రయత్నాలు జరుగుతున్నాయి చాలా కాలంగా. ఈ సినిమాలో సుధీర్‌ బాబు నటించనున్నాడన్న ప్రచారం బాగా విన్పిస్తోంది. అలాగే సైనా నెహ్వాల్‌ జీవిత చరిత్ర కూడా బాలీవుడ్‌లోనే తెరకెక్కుతోంది. 'సైనా' టైటిల్‌తో శ్రద్ధా కపూర్‌ ప్రధాన పాత్రలో ఈ సినిమా తెరకెక్కుతోంది. స్పోర్ట్స్‌ నేపధ్యంలో తెరకెక్కిన 'మేరీకోమ్‌' సినిమా ఘన విజయం సాధించింది. ప్రియాంక చోప్రా ప్రధాన పాత్రలో తెరకెక్కిన ఈ చిత్రం కూడా బయోపిక్‌ కావడం విశేషం.
