ఈ మధ్య హారర్‌ చిత్రాలు ఎంతగా పాపులర్‌ అవుతున్నాయో ప్రత్యేకంగా చెప్పనక్కర్లేదు. చిన్న హీరోల సినిమాలుగా స్టార్ట్‌ అయిన హారర్‌ మూవీస్‌ ఇప్పుడు స్టార్‌ హీరోస్‌ని ఎట్రాక్ట్‌ చేస్తున్నాయంటే వాటి హవా ఏ రేంజ్‌లో ఉందో అర్ధం చేసుకోవచ్చు. చిన్న సినిమాగా బుల్లి తెర యాంకర్‌ అయిన ఓంకార్‌ డైరెక్షన్‌లో తెరకెక్కిన 'రాజుగారి గది' సినిమా ప్రేక్షకులను ఎంతగా అలరించిందో తెలుసు కదా. ఈ సినిమా సీక్వెల్‌లో ఏకంగా స్టార్‌ హీరో నాగార్జున నటిస్తున్నాడంటేనే అర్ధమవుతోంది హారర్‌ చిత్రాలు తమ ఉనికిని ఎంతగా చాటుకుంటున్నాయో. అందుకే తాజాగా మరో సీనియర్‌ హీరో కూడా ఇదే జోనర్‌కి సై అంటున్నాడు. ఫ్యామిలీ హీరోగా, యాక్షన్‌ హీరోగా పేరు తెచ్చుకున్న హీరో శ్రీకాంత్‌ తాజా చిత్రం 'రారా'. శంకర్‌ దర్శకత్వంలో తెరకెక్కుతోంది ఈ చిత్రం. ఇదో హారర్‌ అండ్‌ సస్పెన్స్‌ థ్రిల్లర్‌ మూవీ అట. ఈ సినిమా ఫస్ట్‌లుక్‌ పోస్టర్‌ తాజాగా విడుదలైంది. మెగాస్టార్‌ చిరంజీవి చేతుల మీదుగా ఈ సినిమా ఫస్ట్‌లుక్‌ని విడుదల చేయించారు శ్రీకాంత్‌. శ్రీకాంత్‌కి మెగాస్టార్‌ అంటే చాలా ఇష్టం. ఈ ఇద్దరూ కలిసి చేసిన 'శంకర్‌ దాదా ఎమ్‌బిబిఎస్‌' సినిమాలో వీరి మధ్య అనుబంధం నటనలా ఉండదు. చాలా నేచురల్‌గా ఉంటుంది. చిరంజీవి చేతుల మీదుగా తన కొత్త సినిమా పోస్టర్‌ని విడుదల చేయించడం చాలా సంతోషంగా ఉందన్నారు శ్రీకాంత్‌. అలాగే చిరంజీవి కూడా తన తమ్ముడు శ్రీకాంత్‌ సినిమా మంచి విజయం సాధించాలని కోరకుంటున్నానని శ్రీకాంత్‌కి మనస్పూర్తిగా శుభాకాంక్షలు తెలిపారు. శ్రీకాంత్‌ చేస్తోన్న ఈ కొత్త ప్రయత్నానికి ముందే మెగా సపోర్ట్‌ లభించేసింది.
