టాలీవుడ్‌, బాలీవుడ్‌, కోలీవుడ్‌ అనే తేడా లేకుండా ఒకప్పుడు చేతినిండా సినిమాలతో బిజీగా గడిపింది శృతిహాసన్‌. కానీ ఇప్పుడా పరిస్థితి లేదు. చాలా కాలంగా శృతిహాసన్‌ సినిమాల్లో కనిపించడం లేదు. లేటెస్ట్‌గా కోలీవుడ్‌లో 'లాభం' అనే ఓ ప్రాజెక్టుకు సైన్‌ చేసింది. విజయ్‌ సేతుపతి ఈ సినిమాలో హీరో. కాగా తెలుగులోనూ ఓ ప్రాజెక్ట్‌ శృతి చేతికి చిక్కిందంటూ ప్రచారం జరుగుతోంది. అదే రవితేజ - గోపీచంద్‌ మలినేని కాంబో మూవీ.
అయితే అధికారిక ప్రకటన లేదు ఈ ప్రాజెక్టులపై. ఇదిలా ఉంటే, శృతిహాసన్‌ హాలీవుడ్‌పై దృష్టి పెట్టిందా.? అంటే అవుననే సమాచారమ్‌ కూడా అందుతోంది. అమెరికాకి సంబంధించిన 'ట్రెడ్‌స్టోన్‌' అనే వెబ్‌ సిరీస్‌లో శృతి కీలక పాత్ర పోషిస్తోందట. ఈ వెబ్‌ సిరీస్‌లో శృతిహాసన్‌ ఓ వెయిట్రెస్‌ పాత్రలో కనిపించనుందట. వెయిట్రెస్‌ అయినా, సీక్రెట్‌ మర్డర్స్‌ చేసే యువతి పాత్రట అది. అయితే ఎందుకు ఆమె అలా సీక్రెట్‌ మర్డర్స్‌ చేయాల్సి వచ్చింది తెలియాలంటే ఆ 'ట్రెడ్‌స్టోన్‌' వెబ్‌ సిరీస్‌ని రెగ్యులర్‌గా ఫాలో అవ్వాల్సిందే.
బాలీవుడ్‌ భామ, దేశీ గాళ్‌ ప్రియాంకా చోప్రా కూడా ఇంటర్నేషనల్‌ వెబ్‌ సిరీస్‌లో నటించి పాపులర్‌ అయ్యింది. ఇప్పుడు ఆమె హాలీవుడ్‌లో కొన్ని సినిమాల్లో కూడా నటిస్తోంది. అలాగే శృతిహాసన్‌ కూడా త్వరలో హాలీవుడ్‌ మూవీస్‌తోనూ బిజీ అవుతుందేమో చూడాలిక.
