రాజ‌మౌళిని ముద్దుగా అమ‌ర‌శిల్పి జ‌క్క‌న్న అని పిలుచుకొంటారు అభిమానులు. ఎందుకంటే.. ఆయ‌నకి ఏదీ ఓ ప‌ట్టాన న‌చ్చ‌దు. జ‌క్క‌న్నలా సినిమాని చెక్కుతూనే ఉంటాడు. ప్రీ ప్రొడ‌క్ష‌న్ కీ, పోస్ట్ ప్రొడ‌క్ష‌న్‌కీ రాజమౌళి చాలా టైమ్ తీసుకొంటాడు. అయితే అందుకు త‌గిన ఫ‌లితం కూడా వ‌స్తుంటుంది. అలా...చెక్క‌డం వ‌ల్లే బాహుబ‌లి, ఆర్.ఆర్.ఆర్ లాంటి అద్భుతాలు ఆవిష్కృత‌మ‌య్యాయి. ప్ర‌స్తుతం మహేష్ బాబుతో ఓ సినిమా చేయ‌బోతున్నాడు రాజమౌళి. 2023లో ఈసినిమా ప‌ట్టాలెక్కుతుంద‌ని అంతా భావించారు. కానీ.. ఈ సినిమా 2023లో క్లాప్ కొట్టుకోవ‌డం లేదు. 2024లో ఈ చిత్రాన్ని ప్రారంభిస్తార‌ని 2025లో విడుద‌ల అవుతుంద‌ని టాక్‌.
ఈ సినిమా యేడాది ఆల‌స్యం అవ్వ‌డానికి చాలా కార‌ణాలున్నాయి. ఒక‌టి... స్క్రిప్టుని పూర్తి స్థాయిలో సిద్ధం చేయ‌డానికి అంత స‌మ‌యం అవ‌స‌రం. రెండోది.. ఈ సినిమా కోసం కొంత‌మంది హాలీవుడ్ టెక్నీషియ‌న్ల‌నీ, న‌టీన‌టుల్ని రంగంలోకి దింపాల‌ని రాజమౌళి ప్లాన్ చేస్తున్నాడు. వాళ్ల రాక‌కు స‌మ‌యం ప‌డుతుంది. అన్నింటికంటే ముఖ్యంగా ఈలోగా త్రివిక్ర‌మ్ సినిమా పూర్తి చేయాలి మహేష్. త్రివిక్ర‌మ్ ఇంకా క‌థ వండ‌డంలోనే ఉన్నాడ‌ని, ఈ సినిమా పూర్త‌యి, బ‌య‌ట‌కు రావ‌డానికి స‌మ‌యం ప‌డుతుంద‌ని రాజమౌళి గ్ర‌హించాడు. అందుకే త‌న సినిమా ప‌నులు కూడా మెల్ల‌గా చేసుకోవాల‌ని భావిస్తున్నాడు. 2023 అంతా.. మహేష్.. త్రివిక్ర‌మ్ సినిమా పనుల్లోనే ఉంటాడు. ఈలోగా.. రాజమౌళి ప్రీ ప్రొడ‌క్ష‌న్ పూర్తి చేస్తాడు.
