యాంక‌ర్‌గా సుమ సుప‌రిచిత‌మే. ఏ సినిమా ఆడియో, ప్రీ రిలీజ్ ఫంక్ష‌న్ అయినా సుమ క‌నిపిస్తుంది. ఏ టీవీ షో చూసినా సుమ అల్ల‌రి చేస్తూ ద‌ర్శ‌న‌మిస్తుంది. తానో బుల్లి తెర స్టార్‌. అలాంటి సుమ గురించి ఓ వార్త చ‌క్క‌ర్లు కొడుతోంది. అల్లు అర్జున్ - సుకుమార్ కాంబోలో తెర‌కెక్కుతున్న `పుష్ష‌`లో సుమ ఓ కీల‌క పాత్ర పోషిస్తోంద‌ని, బ‌న్నీ సోద‌రిగా న‌టిస్తోంద‌ని వార్త‌లొచ్చాయి. అది నిజ‌మే అనుకున్నారంతా. ఎందుకంటే.. సుమ‌లో యాక్టింగ్ టాలెంట్ కావ‌ల్సినంత ఉంది. పైగా యాంక‌ర్ల‌ను తెర‌పైకి తీసుకురావ‌డం సుకుమార్‌కీ అల‌వాటే.

రంగ‌స్థ‌లంలో అన‌సూయ‌కి రంగ‌మ్మ‌త్త పాత్ర ఇచ్చి ఆమె కెరీర్ మ‌లుపు తిప్పాడు. అలాంటి పాత్రే సుమ కోసం కూడా డిజైన్ చేశాడ‌నుకున్నారు. అయితే..ఈ సినిమాలో సుమ లేద‌ని స్ప‌ష్టం అయిపోయింది. ఈ సినిమాలో న‌టించ‌డం లేద‌ని సుమ తేల్చేసింది. ద‌ర్శ‌క నిర్మాత‌లూ ఇదే మాట చెప్పారు. సో.. సుమ పై వ‌చ్చిన వార్త కేవ‌లం గాసిప్ అన్న‌మాట‌. కాక‌పోతే.. సుమ ని వెండి తెర‌పై తీసుకొస్తే బాగానే ఉంటుంది. ఎందుకంటే.. ఆమెకు మంచి ఫాలోయింగ్ ఉంది. పైగా త‌న టైమింగ్ బాగుంటుంది. భ‌విష్య‌త్తులో ఎవ‌రైనా సుమ‌కోసం మంచి పాత్ర‌ల్ని డిజైన్ చేస్తారేమో చూడాలి.