సురేంద‌ర్ రెడ్డి ప్ర‌స్తుతం అఖిల్ ని `ఏజెంట్`గా తీర్చిదిద్దుతున్న సంగ‌తి తెలిసిందే. ఈలోగా ప‌వ‌న్ క‌ల్యాణ్‌తో ఓ సినిమా చేసే ఆఫ‌ర్ వ‌చ్చింది. ప‌వ‌న్ - సురేంద‌ర్ రెడ్డి కాంబోలో ఓ సినిమా రాబోతోంద‌ని అధికారికంగానూ ప్ర‌క‌టించేశారు. `ఏజెంట్` త‌ర‌వాత ప‌వ‌న్ సినిమా ఉంటుంద‌ని ఆశించారంతా. అయితే అంత‌కంటే ముందు సురేంద‌ర్ రెడ్డి మ‌రో సినిమాని పూర్తి చేయ‌బోతున్నాడ‌ట‌.

ఇటీవ‌ల నితిన్ కోసం ఓ చిన్న క‌థ రెడీ చేశాడ‌ట సూరి. అది నితిన్ కి బాగా న‌చ్చింద‌ని, త‌న సొంత బ్యాన‌ర్‌లోనే ఈసినిమాని చేయ‌డానికి ముందుకొచ్చాడ‌ని స‌మాచారం. అతి త‌క్కువ బ‌డ్జెట్‌లో, అతి త‌క్కువ స‌మ‌యంలో ఈ సినిమాని ప్ర‌యోగాత్మ‌కంగా పూర్తి చేయాల‌నుకుంటున్నార్ట‌. ఈ యేడాది చివ‌రి నాటికి `ఏజెంట్` షూటింగ్ పూర్త‌యితే, ఆ వెంట‌నే... నితిన్ సినిమా మొద‌లెట్టేస్తారు. కేవ‌లం మూడు నెల‌ల్లో నితిన్ సినిమా అయిపోతుంద‌ట‌. ఆ త‌ర‌వాత‌.. ప‌వ‌న్ సినిమా ప‌ట్టాలెక్కిస్తారు. త్వ‌ర‌లోనే ఈ కాంబినేషన్ కి సంబంధించిన పూర్తి వివ‌రాలు బ‌య‌ట‌కు రానున్నాయి.