ఏదైనా కొత్త‌గా ఆలోచించ‌డం మ‌ణిర‌త్నంకి అల‌వాటు. ట్రెండ్ ని ఫాలో అవ్వ‌డం కాదు, సృష్టించ‌డానికి ఇష్ట‌ప‌‌డ‌తారాయ‌న‌. ఇప్పుడు వెబ్ సిరీస్ ల కాలం న‌డుస్తోంది. త‌న‌కీ ఓ వెబ్ సిరీస్ చేయాల‌న్న ఆలోచ‌న వ‌చ్చింది. అయితే కొత్త‌ర‌కంగా. అంద‌రిలా కాకుండా విభిన్నంగా ఆలోచించారు మ‌ణిర‌త్నం.

`న‌వ‌ర‌స‌` పేరుతో ఓ వెబ్ సిరీస్ ని తీయాల‌ని డిసైడ్ అయ్యారు. పేరుకు త‌గ్గ‌ట్టే తొమ్మిది ఎపిసోడ్ల‌తో సాగే వెబ్ సిరీస్ ఇది. ఒక్కో ఎపిసోడ్‌కీ ఒక్కో ద‌ర్శ‌కుడు. ఒక్కో ఎపిసోడ్‌కి ఒక్కో హీరో. మ‌ణిర‌త్నం స్వ‌యంగా ఓ ఎపిసోడ్ కి ద‌ర్శ‌క‌త్వం వహిస్తారు. మిగిలిన ఎనిమిదీ ఎనిమిదిమంది ద‌ర్శ‌కుల‌కు అప్ప‌గిస్తారు. ఒక్కో ఎపిసోడ్ లో ఒక్కో హీరో క‌నిపిస్తారు. ఇప్ప‌టికే మాధ‌వ‌న్‌, సూర్య‌, సిద్దార్థ్‌ల ను త‌న హీరోలుగా ఎంచుకున్నార‌ని తెలుస్తోంది. మ‌రో ఆరుగురు హీరోలు, ఎనిమిదిమంది ద‌ర్శ‌కులు కావాలి. వాళ్ల వివ‌రాల్ని త్వ‌ర‌లో ప్ర‌క‌టిస్తారు. తెలుగు నుంచి కూడా కొంత‌మంది ద‌ర్శ‌కులు, హీరోల్ని ఎంచుకుంటార‌ని ప్ర‌చారం జ‌రుగుతోంది.