తమిళ హీరో సూర్య తాజా చిత్రం 'తానా సెరెంద కూట్టమ్‌'. తెలుగులో 'గ్యాంగ్‌' టైటిల్‌తో విడుదల చేస్తున్నారు. తమిళంతో పాటు తెలుగులో కూడా సూర్య సినిమాలకు మార్కెట్‌ బాగానే ఉంటుంది. ఆయన నటించిన 'సింగం' సిరీస్‌ చిత్రాలు తెలుగులో కూడా మంచి విజయాలు అందుకున్నాయి. 

అలాగే '24' చిత్రానికీ తెలుగు ఆడియన్స్‌ నుండి ఆదరణ లభించింది. తాజా చిత్రాన్ని యు.వీ క్రియేషన్స్‌ సంస్థ తెలుగులో విడుదల చేస్తోంది. సంక్రాంతి రేస్‌లో మన తెలుగు సినిమాలతో పాటు, సూర్య 'గ్యాంగ్‌' కూడా రేసులోకి దూసుకొస్తోంది. జనవరి 12న ఈ సినిమా ప్రేక్షకుల ముందుకు వస్తోంది. తాజాగా ఈ సినిమా ఫస్ట్‌లుక్‌ని తెలుగులో విడుదల చేశారు. ఇటీవల ఈ సినిమా తమిళ టీజర్‌ను విడుదల చేశారు. ఆ టీజర్‌కి మంచి రెస్పాన్స్‌ వచ్చింది. 

'బాహుబలి'తో శివగామిగా పవర్‌ ఫుల్‌ పాత్రలో కనిపించిన రమ్యకృష్ణ ఈ సినిమాలో కీలక పాత్ర పోషిస్తోంది. రాజమాతగా 'బాహుబలి'లో రాజసం ప్రదర్శిస్తే, ఈ సినిమాలో పంచె కట్టి, సూర్యతో యమ జోరుగా స్టెప్పులేస్తోంది. అనిరుధ్‌ ఈ సినిమాకి మ్యూజిక్‌ అందించారు. అనిరుధ్‌ అదిరిపోయే మ్యూజిక్‌కి ఓ పాటలో సూర్య, రమ్యకృష్ణ కలిసి లుంగీ డాన్స్‌ ఇరగదీసేస్తున్నారు. అయితే తాజా లుక్‌లో సూర్య చాలా జోష్‌గా కనిపిస్తున్నాడు. 

'సింగం' సిరీస్‌లో పవర్‌ఫుల్‌ పాత్రల్లో చూశాం సూర్యని. కానీ ఈ సినిమాలో చాలా జోష్‌గా కనిపించబోతున్నారనే విషయం ఫస్ట్‌లుక్‌ చూస్తుంటే అర్ధమవుతోంది. అయితే ఈ సినిమాలో కూడా సూర్య పోలీస్‌ పాత్రలోనే కనిపించనున్నారట. అది సీబీఐ అధికారి పాత్రనీ తెలుస్తోంది. విఘ్నేష్‌ శివన్‌ దర్శకత్వంలో ఈ సినిమా తెరకెక్కుతోంది. అందాల కీర్తి సురేష్‌ హీరోయిన్‌గా నటిస్తోంది.