'ఝుమ్మంది నాదం' సినిమాతో తెలుగు తెరకు హీరోయిన్‌గా పరిచయమైన ముద్దుగుమ్మ తాప్సీ. తర్వాత అన్నీ గ్లామరస్‌ పాత్రలే చేసింది. రవితేజ, వెంకటేష్‌, గోపీచంద్‌ తదితర పాపులర్‌ హీరోలతో పలు కమర్షియల్‌ మూవీస్‌లో నటించి, కొన్ని విజయాలను కూడా తన ఖాతాలో వేసుకుంది. అయితే టాలీవుడ్‌ ఆమెను గ్లామర్‌ డాళ్‌గానే చూసింది, తప్ప ఆమెలో దాగున్న అపారమైన టాలెంట్‌ని బయటికి తెచ్చే ప్రయత్నం చేయలేదు. 

దాంతో బాలీవుడ్‌కెళ్లిన తాప్సీ, అక్కడ తొలి నాళ్లలోనే ప్రాధాన్యత ఉన్న క్యారెక్టర్స్‌లో నటించి, కొద్ది కాలంలోనే ప్రత్యేక గుర్తింపు తెచ్చుకుంది. తనకున్న గ్లామర్‌ ఇమేజ్‌ని పక్కన పెట్టేసి, యాక్షన్‌ గాళ్‌గా స్పెషల్‌ ఇమేజ్‌ సంపాదించింది. అక్కడ గుర్తింపు దక్కాక టాలీవుడ్‌ని మాటలతో ఏకి పారేసింది. తర్వాత క్షమాపణలు కూడా చెప్పిందనుకోండి. అయితే తాజాగా తాప్సీ ఈ మధ్య టాలీవుడ్‌లో కూడా బిజీ అవుతోంది. బాలీవుడ్‌కెళ్లొచ్చాక తాప్సీ తెలుగులో నటించిన చిత్రం 'ఆనందోబ్రహ్మ'. సింపుల్‌ బడ్జెట్‌తో ఈ చిత్రం మంచి విజయంతో పాటు, విమర్శకుల ప్రశంసలు కూడా అందుకుంది. 

ఆ తర్వాత తాప్సీ నుండి వస్తున్న మరో చిత్రం 'నీవెవరో'. ఆది పినిశెట్టి హీరోగా నటిస్తున్నాడు. తాప్సీ, 'గురు' ఫేం రితికా సింగ్‌ హీరోయిన్లుగా నటిస్తున్నారు. ఈ సినిమాలో తాప్సీ యాక్షన్‌ గాళ్‌గా కనిపించనుంది. ఇటీవల విడుదలైన ట్రైలర్‌లో తాప్సీ యాక్షన్‌ ఎలిమెంట్స్‌ని బాగా హైలైట్‌ చేశారు. అంటే టాలీవుడ్‌లో కూడా తాప్సీ నట విశ్వరూపం చూపించేలానే ఉంది మరి. 

ఆగష్టు 24న 'నీవెవరో' చిత్రం ప్రేక్షకుల ముందుకు రానుంది.