సాధారణంగా త్రివిక్రమ్‌ శ్రీనివాస్‌ ఎవ్వర్నీ ఎక్కువగా పొగడడు. ఒకవేళ పొగడాల్సి వస్తే చాలా ఆచి తూచి వ్యవహరిస్తాడు. పవన్ - త్రివిక్రమ్‌ అత్యంత సన్నిహితులు అన్న సంగతి తెలిసిందే. నిన్న జరిగిన 'అజ్ఞాతవాసి' ఆడియో రిలీజ్‌ ఫంక్షన్‌లో పవన్‌ని పొగడడమే పనిగా పెట్టుకున్నాడు త్రివిక్రమ్‌. ఇంతకు ముందెన్నడూ త్రివిక్రమ్‌ నోట పవన్ గురించి ఇంత ఎక్కువగా పొగడ్తలు వినలేదు. ఆయన వ్యక్తిత్వం గురించి మాట్లాడడం విన్నాం.. కానీ, ఈ సారి అలా కాదు, పవన్ నటన గురించి త్రివిక్రమ్‌ ప్రత్యేకంగా పొగడ్తల వర్షం కురిపించాడు.
ఈ సినిమాలో పవన్ నట విశ్వరూపం చూస్తారు అని త్రివిక్రమ్‌ చెప్పడం అందర్నీ విశేషంగా ఆకట్టుకుంది. ఈ ఆడియో ఫంక్షన్‌లో త్రివిక్రమ్‌ కేవలం పవన్‌ని మాత్రమే పొగడలేదు. సినిమాకి పని చేసిన ప్రతీ టెక్నీషియన్‌నీ, సినిమాటోగ్రాఫర్‌ దగ్గర్నుంచీ, ప్రతీ చిన్నా, పెద్దా పాత్రధారుల వరకూ పేరు పేరునా ప్రశంసించాడు. తెరపై ఎవరెవరు ఎలా చేస్తారో మీకందరికీ తెలుసు. కానీ తెరపై వారలా కనిపించేందుకు అసలు కారణమైన తెర వెనుక టీమ్‌ గురించి మీరందరూ ఖఛ్చితంగా తెలుసుకోవాలి అని అభిమానులను ముందుగానే అలర్ట్‌ చేసి, ఏ ఒక్కర్నీ మర్చిపోకుండా అందరి గురించి చెప్పాడు త్రివిక్రమ్‌. అలనాటి మేటి నటీనటులతో ఈ తరం నటీనటులను పోల్చి చెప్పడం, ఎందరో మహానుభావులు.. అందరికీ వందనాలు అని తన ప్రసంగాన్ని మొదలు పెట్టి, దాంతోనే పూర్తి చేయడం చాలా ఆశక్తిగా అనిపించింది.
అంతేకాదు మాటల మాంత్రికుడు త్రివిక్రమ్‌ ఎప్పుడూ తెరపై తన డైలాగ్స్‌తో సత్తా చాటడమే కానీ, ఇంతసేపు స్టేజ్‌పై లైవ్‌గా మాట్లాడింది లేదు. అంతేకాదు తన సినిమాల గురించి కూడా ఇంతకు ముందెన్నడూ ఇంత గొప్పగా చెప్పింది లేదు. అంతగా తన మాటలతో అభిమానుల్ని మెస్మరైజ్‌ చేశాడు మాటల మాంత్రికుడు త్రివిక్రమ్‌ శ్రీనివాస్‌. 'అజ్ఞాతవాసి' సినిమా జనవరి 10న ప్రపంచ వ్యాప్తంగా గ్రాండ్‌ రిలీజ్‌ కానుంది.
