నాని - శివ నిర్వాణ కాంబినేష‌న్‌లో రూపొందించిన రెండో చిత్రం `ట‌క్ జగదీష్`. ఇది వ‌ర‌కు వీరిద్ద‌రి కాంబోలో `నిన్ను కోరి` వ‌చ్చిన సంగ‌తి తెలిసిందే. ఆసినిమా బాగా ఆడింది. అందుకే `ట‌క్ జగదీష్`పై అంచ‌నాలు ఏర్ప‌డ్డాయి. నిజానికి ఈ సినిమా ఎప్పుడో విడుదల కావాల్సింది. క‌రోనా వ‌ల్ల ఆగిపోయింది. ఓటీటీ నుంచి ఎన్ని ఆఫ‌ర్లు వ‌చ్చినా చ‌లించ‌లేదు. థియేట‌ర్ రిలీజ్ కే నిర్మాత‌లు క‌ట్టుబ‌డి ఉండ‌డంతో.. ఈ సినిమా విడుదల బాగా ఆల‌స్య‌మైపోయింది.
అయితే ఇప్ప‌టికీ ప‌రిస్థితి స‌ద్దుమ‌ణ‌క‌పోవ‌డంతో, ఈ సినిమాని నేరుగా ఓటీటీలోనే విడుదల చేయ‌డానికి నిర్మాత‌లు ఫిక్స‌య్యారు. అమేజాన్ ప్రైమ్ ఈ సినిమా హ‌క్కుల్ని కొనుగోలు చేసిన‌ట్టు టాక్. త్వ‌ర‌లోనే అందుకు సంబంధించిన అధికారిక ప్ర‌క‌ట‌న రానుంది. ఈ సినిమా బడ్జెట్ దాదాపుగా 40 కోట్లు. అయితే అమేజాన్ నుంచి ఏకంగా 37 కోట్లు వ‌చ్చిన‌ట్టు టాక్.
ఇవి కాకుండా హిందీ డ‌బ్బింగ్, శాటిలైట్ ద్వారా మ‌రో 13 కోట్ల వ‌ర‌కూ వ‌చ్చిందంట. అంటే... ఈ సినిమాకి రూ.50 కోట్ల బిజినెస్ జ‌రిగిపోయిన‌ట్టే. ఇప్పుడున్న ప‌రిస్థితుల్లో... ఇది మంచి డీల్ అనుకోవాలి. ఎందుకంటే.. థియేట‌ర్ల‌లో విడుద‌లైనా, ఈ సినిమాకి 37 కోట్లు వ‌స్తాయ‌న్న గ్యారెంటీ లేదు. సినిమా ఫెయిల్ అయితే ఇందులో స‌గం కూడా రావు. కాబ‌ట్టి... ఇది మంచి బేర‌మే.
