పవర్‌ స్టార్‌ పవన్‌ కళ్యాణ్‌ రీ ఎంట్రీ మూవీగా తెరకెక్కుతోన్న ‘వకీల్‌ సాబ్‌’ని ఢీ కొట్టే అపోజిట్‌ లాయర్‌ సాబ్‌గా వెర్సటైల్‌ యాక్టర్‌ ప్రకాష్‌ రాజ్‌ నటిస్తున్నారు. వీరిద్దరి మధ్యా వచ్చే సన్నివేశాలు సినిమాకి హైలైట్‌ కానున్నాయట. గతంలో ఈ ఇద్దరి కాంబినేషన్‌లో చాలా సినిమాలొచ్చాయి. కానీ, వాటిన్నింట్లోకీ, ‘బద్రి’ మూవీది ప్రత్యేకమైన స్థానం. ‘బద్రి’లో ‘నువ్వు నందా అయితే, నేను బద్రి.. బద్రినాధ్‌’ అంటూ పవర్‌ స్టార్‌ పవన్‌ కళ్యాణ్‌ చెప్పే డైలాగ్‌, ఆ పవర్‌ని ఢీకొట్టే ప్రకాష్‌ రాజ్‌ నటన ఎప్పటికీ మర్చిపోలేం. అంతే పవర్‌ఫుల్‌గా ఈ సినిమాలో వీరిద్దరి మధ్యా వచ్చే సీన్లుంటాయట. పోటా పోటీగా వాదనలు జరిపే కోర్టు సీన్లు సినిమా రేంజ్ ని నెక్స్ట్ లెవెల్ కి తీసుకెళతాయంటున్నారు.
ప్రస్తుతం శరవేగంగా షూటింగ్‌ జరుపుకుంటున్న ఈ సినిమాని మేలో రిలీజ్‌ చేసేందుకు సన్నాహాలు జరుగుతున్నాయి. బాలీవుడ్‌ నిర్మాత బోనీ కపూర్‌తో కలిసి దిల్‌ రాజు ఈ సినిమాని నిర్మిస్తున్నారు. బాలీవుడ్‌ ‘పింక్‌’ రీమేక్‌ అయిన ఈ సినిమాకి వేణు శ్రీరామ్‌ దర్శకత్వం వహిస్తుండగా, తమన్‌ మ్యూజిక్‌ అందిస్తున్నారు. అంజలి, నివేదా థామస్‌ హీరోయిన్లుగా నటిస్తున్నారు. అన్నట్లు ఇటీవల రిలీజైన ‘మగువా.. మగువా..’ సాంగ్‌కి మంచి రెస్పాన్స్‌ వచ్చిన సంగతి తెలిసిందే.
