బ‌డా హీరో సినిమా వ‌స్తోందంటే రికార్డు క‌బుర్లు వెల్లువ‌లా వినిపిస్తుంటాయి. ఇది వ‌ర‌కు వ‌సూళ్లు, రిలీజ్ కేంద్రాల విష‌యంలోనే ఈ ఊసులు. ఇప్పుడు ప్ర‌తీ చిన్న విష‌యంలోనూ రికార్డుల గోలే. టీజ‌ర్ ఎంత మంది చూశారు? ట్రైల‌ర్‌కి ఎన్ని లైకులు వ‌చ్చాయి..? వీటిపైనా రికార్డులు న‌మోదైపోతున్నాయి. వ‌కీల్ సాబ్ ఇప్పుడు యూ ట్యూబ్ లో హ‌ల్ చ‌ల్ చేస్తోంది. కొత్త రికార్డులు సృష్టిస్తోంది. ప‌వ‌న్ క‌ల్యాణ్ సినిమా క‌దా. ఆ హ‌డావుడి త‌ప్ప‌నిస‌రి.

అయితే రికార్డుల విష‌యంలో ఈ సినిమా పీఆర్ టీమ్ కాస్త తొంద‌ర ప‌డుతుందేమో అనిపిస్తోంది. వ‌కీల్ సాబ్ ట్రైల‌ర్ సోమ‌వారం సాయింత్రం 6 గంట‌ల‌కు విడుద‌లైంది. స‌రిగ్గా 6 గంట‌ల 8 నిమిషాల‌కు... `మా ట్రైల‌ర్ ల‌క్ష లైకులు క్రాస్ చేసింది. తొలి ఎనిమిది నిమిషాల‌కే ఈ ఘ‌న‌త సాధించింది` అంటూ... పీఆర్ టీమ్ నుంచి ఓ పోస్ట‌ర్ బ‌య‌ట‌కు వ‌చ్చింది. 8 నిమిషాల‌కే ల‌క్ష లైకులు సాధించ‌డం మామూలు విష‌యం కాదు. కానీ.. ఆ పోస్ట‌ర్ కూడా స‌రిగ్గా.. వ‌కీల్ సాబ్ ట్రైల‌ర్ విడుద‌లైన 8 నిమిషాల‌కే బ‌య‌ట‌కు రావ‌డం ఆశ్చ‌ర్యం క‌లిగిస్తోంది. పోస్ట‌ర్ డిజైన్ చేయ‌డానికే క‌నీసం 20 నిమిషాల ప‌డుతుంది. అలాంటిది వ‌కీల్ సాబ్ ట్రైల‌ర్ వ‌చ్చిన 8 నిమిషాల‌కే ఆ పోస్ట‌ర్ రావ‌డం... హాస్యాస్పదం గా మారింది. అంటే.. వ‌కీల్ సాబ్ ట్రైల‌ర్ ఈ రికార్డు సాధిస్తుంద‌ని చిత్ర‌బృందానికి ముందే తెలుసా? అనే అనుమానాలు నెటిజ‌న్ల‌లో వ్య‌క్తం అవుతున్నాయి.