ఇండ్ర‌స్ట్రీ అంతా `హిట్‌` ఫార్ములా చుట్టూనే తిరుగుతుంటుంది. హిట్ ఉన్న ద‌ర్శ‌కుల‌కు, హీరోల‌కు, హీరోయిన్ల‌కు ఉన్న గిరాకీ అంతా ఇంతా కాదు. ఓ ద‌ర్శ‌కుడు హిట్ కొడితే... హీరోలు క‌ర్చీఫ్‌లు వేసేస్తారు. నిర్మాత‌లు అడ్వాన్సుల‌తో రెడీ అయిపోతారు. కానీ.. అదేంటో.. ఓ సూప‌ర్ డూప‌ర్ హిట్ కొట్టిన వంశీ పైడిప‌ల్లి ప‌రిస్థితి మాత్రం విభిన్నంగా ఉంది. మ‌హ‌ర్షితో అదిరిపోయే హిట్ ఇచ్చాడు వంశీ పైడిప‌ల్లి. మ‌హేష్ కెరీర్‌లో వ‌న్ ఆఫ్ ది బెస్ట్ మూవీ అది. మ‌హేష్ ఎంత‌గా వంశీని ఇష్ట‌ప‌డ్డాడంటే - ఆ వెంట‌నే మ‌రో సినిమా చేయ‌డానికి కూడా రెడీ అయిపోయాడు. కానీ... మ‌హేష్‌కి న‌చ్చేలా క‌థ రెడీ చేసుకోవ‌డంలో వంశీ విఫ‌లం అయ్యాడు. దాంతో.. మ‌హేష్ దృష్టి మ‌ళ్లిపోయింది. వంశీ పైడిప‌ల్లిని ప‌క్క‌న పెట్టి, ప‌ర‌శురామ్ తో సినిమా చేయ‌డానికి ఫిక్స్ అయిపోయాడు.

మ‌హేష్ నో చెప్ప‌డంతో - చ‌ర‌ణ్ గూటికి చేరాడు వంశీ. ఇది వ‌ర‌కే చ‌ర‌ణ్ కి `ఎవ‌డు` లాంటి హిట్ ఇవ్వ‌డంతో, చ‌ర‌ణ్ కూడా వంశీ తో సినిమా చేయ‌డానికి రెడీ అయ్యాడు. కానీ.. మ‌ళ్లీ అదే స‌మ‌స్య‌. క‌థ‌ని త‌యారు చేసుకోవ‌డంలో వంశీ ఘోరంగా విఫ‌లం అయ్యాడు. చ‌ర‌ణ్‌తో ఇప్ప‌టికే ప‌లుమార్లు వంశీ సిట్టింగ్ వేశాడు. క‌థలు చెప్పాడు. కానీ అదేదీ చ‌ర‌ణ్‌ని క‌దిలించ‌లేదు. దాంతో.. ఈసినిమాని చ‌ర‌ణ్ ప‌క్క‌న పెట్టేశాడ‌ని టాక్‌. `ఆర్‌.ఆర్‌.ఆర్‌` త‌ర‌వాత చ‌ర‌ణ్ సినిమా ఇప్ప‌టి వ‌ర‌కూ ఖాయం కాలేదు. చ‌ర‌ణ్ దృష్టి,... కొర‌టాల‌, త్రివిక్ర‌మ్ లాంటి ద‌ర్శ‌కుల‌పై ఉంద‌ని వంశీ పైడిప‌ల్లితో చ‌ర‌ణ్ సినిమా చేయ‌డం క‌ష్ట‌మే అని టాలీవుడ్ లో టాక్ వినిపిస్తోంది.