వెంక‌టేష్ పోకిరి రాజా, కొండ‌ప‌ల్లి రాజానే కాదు.. రీమేక్ రాజా కూడా. ఎందుకంటే.. త‌న కెరీర్ లో ఎక్కువ‌గా రీమేకులే ఉన్నాయి. తాజాగా `దృశ్య‌మ్‌` ని రీమేక్ చేసి హిట్టు కొట్టిన వెంకీ, దృశ్య‌మ్ 2పై కూడా దృష్టి పెట్టాడు. మోహ‌న్ లాల్ - మీనా జంట‌గా న‌టించిన దృశ్య‌మ్ 2... ఓటీటీలో విడుద‌లైంది కూడా. శుక్ర‌వారం విడుద‌లైన ఈ చిత్రానికి గొప్ప స్పంద‌న వ‌స్తోంది. `దృశ్య‌మ్‌` క‌థ ఎక్క‌డైతే ఆగిందో, అక్క‌డి నుంచే.. దృశ్య‌మ్ 2 క‌థ మొద‌ల‌వుతుంది.

క‌థ‌లో మ‌లుపులు అదిరిపోయాయ‌ని, చివ‌రి 30 నిమిషాలూ ఈ క‌థ‌ని మ‌రో స్థాయిలోకి తీసుకెళ్లాయ‌ని చెబుతున్నారు. డైరెక్ట‌ర్ త‌న బ్రిలియ‌న్సీ చూపించాడ‌ని, ఈ సినిమా అద్భుతంగా ఉంద‌ని, విమ‌ర్శ‌కులు పొగ‌డ్త‌ల‌తో ముంచేస్తున్నారు. సోష‌ల్ మీడియాలోనూ.. ఈ సినిమా గురించి సినీ ప్రేమికులు గొప్ప‌గా మాట్లాడుతున్నారు. రాస్తున్నారు. దాంతో వెంకీకి ఉత్సాహం వ‌చ్చేసింది. దృశ్య‌మ్ 2 రీమేక్ హ‌క్కులు సురేష్ బాబు ద‌క్కించుకున్న సంగ‌తి తెలిసిందే. ప్ర‌స్తుతం `ఎఫ్ 3`, `నార‌ప్ప‌` సినిమాలో బిజీగా ఉన్నాడు వెంకీ. `ఎఫ్ 3` ముగిసిన వెంట‌నే.. `దృశ్య‌మ్ 2`ని ప‌ట్టాలెక్కించ‌డం ఖాయం.