విజ‌య్‌సేతుప‌తి.. ఏం చేసినా ప‌ర్‌ఫెక్ట్ గా ఉంటుంది. పాత్ర‌కోసం త‌న‌ని తాను మార్చుకోవ‌డానికి ఏం చేయ‌మ‌న్నా చేస్తాడు. ఎంత క‌ష్ట‌మైనా ప‌డ‌తాడు. త‌న ప‌ర్‌ఫెక్ష‌న్‌కి తాజా నిద‌ర్శ‌నం `800` సినిమా. ప్ర‌పంచ అత్యుత్త‌మ బౌల‌ర్ల‌లో ఒక‌డిగా పేరొందిన శ్రీ‌లంక క్రికెట‌ర్‌ ముత్త‌య్య ముర‌ళీధ‌ర‌న్ జీవిత క‌థ ఆధారంగా ఈ సినిమా రూపొందుతోంది. ఆ పాత్ర‌లో విజ‌య్ సేతుప‌తి క‌నిపించ‌నున్నాడు.

తాజాగా ఈసినిమా ఫస్ట్ లుక్ విడుద‌ల చేసింది చిత్ర‌బృందం. అందులో విజ‌య్‌ని చూస్తే.. అది విజ‌య్‌నా? ముత్త‌య్య‌నా? అనే అనుమానాలు వేస్తున్నాయి. నిజంగా అంత ప‌ర్‌ఫెక్ట్ గా ఉంది. నిజంగా ముత్త‌య్య ముర‌ళీధ‌ర‌న్ తోనే ఆ పాత్ర చేయిస్తే అంత నికార్సుగా కుదిరిపోయింది లుక్‌. ఈ విష‌యంలో మేక‌ప్ ఆర్టిస్టుల‌తో పాటు, విజ‌య్ డెడికేష‌న్ కి కూడా స‌లామ్ కొట్టాల్సిందే. ఎం.ఎస్‌.శ్రీ‌ప‌తి ఈ చిత్రానికి ద‌ర్శ‌క‌త్వం వ‌హిస్తున్నారు. జ‌న‌వ‌రిలో షూటింగ్ మొద‌ల‌వుతుంది. ఈ సినిమా కోసం విజ‌య్ సేతుప‌తి క్రికెట్ నేర్చుకుంటున్నాడు. ముర‌ళీధ‌ర‌న్ ది ఓ విల‌క్ష‌ణ‌మైన బౌలింగ్ శైలి. దాన్ని అనుక‌రించ‌డం చాలా క‌ష్టం.

కాక‌పోతే.. ఇది విజ‌య్ సేతుప‌తి సినిమా. త‌న‌కు సాధ్యం కాదిదంటూ ఏం లేదు. లుక్కే అలా దింపేశాడంటే... బౌలింగ్ యాక్ష‌న్ దించేయ‌డం ఎంత‌సేపు? లుక్ తోనే అంద‌రి దృష్టినీ త‌న‌వైపుకు తిప్పుకున్న ఈచిత్రం మున్ముందు ఇంకెన్ని అద్భుతాల్ని ప‌రిచ‌యం చేస్తుందో?