అటు క్రికెట్ లో, ఇటు సినిమాల్లో బ‌ద్ద‌ల‌వ్వ‌ని రికార్డ్ అంటూ ఏదీ లేదు. స‌రైన సినిమా, స‌రైన స‌మ‌యంలో రావాలి గానీ, రికార్డుల‌కు కొద‌వ ఉండ‌దు. ఈ విష‌యం.. విక్ర‌మ్ మ‌రోసారి నిరూపించింది. ఎవ‌రికీ సాధ్యం కాదేమో అనుకొన్న బాహుబ‌లి 2 రికార్డుని విక్ర‌మ్ బ‌ద్ద‌లు కొట్టింది. అయితే ఇది త‌మిళ‌నాడులో.

త‌మిళ‌నాడులో నిన్నా మొన్న‌టి వ‌ర‌కూ బాహుబ‌లి 2 దే రికార్డ్‌. వ‌సూళ్ల‌లో ఆ త‌రువాతి స్థానంలో బీస్ట్ ఉండేది. ఇప్పుడు ఈ రెండు సినిమాల్నీ దాటి వెళ్లిపోయింది విక్ర‌మ్‌. త‌మిళ‌నాట ఆదివారానికి దాదాపుగా రూ.160 కోట్లు వ‌సూలు చేసింది విక్ర‌మ్‌. త‌మిళ‌నాట ఇదే రికార్డ్‌. ఇది వ‌ర‌కు బాహుబ‌లి 2 ఫుల్ ర‌న్ లో సాధించిన మొత్తాన్ని... విక్ర‌మ్ కేవ‌లం 17 రోజుల్లో వ‌సూలు చేసింది. ప్ర‌పంచ వ్యాప్తంగా ఈ చిత్రానికి రూ.300 కోట్లు ద‌క్కాయ‌ని టాక్. క‌మ‌ల్ హాస‌న్‌కి చాలా యేళ్ల త‌ర‌వాత ద‌క్కిన విజ‌య‌మిది. ఓ టాప్ స్టార్ ఫామ్ లోకి వ‌స్తే ఎలా ఉంటుందో విక్ర‌మ్ చూపించింది. విజ‌య్ సేతుప‌తి, ఫహ‌ద్ ఫాజిల్ కీల‌క పాత్ర‌లు పోషించిన ఈ చిత్రానికి లోకేష్ క‌న‌గ‌రాజ్ ద‌ర్శ‌క‌త్వం వ‌హించిన సంగ‌తి తెలిసిందే.