విశాల్‌ హీరోగా తెరకెక్కుతోన్న కొత్త చిత్రం పేరే 'అభిమన్యుడు'. కొత్తరకం కథాంశంతో తెరకెక్కుతోన్న చిత్రమిది. తాజాగా ఈ చిత్రం నుండి ఓ పోస్టర్‌ విడుదలైంది. 

ఈ పోస్టర్‌లో ఓల్డ్‌ కంప్యూటర్‌ భాగాలు గుట్టలు గుట్టలుగా కనిపిస్తున్నాయి. అసలింతకీ ఈ 'అభిమన్యుడు' ఏం చేయనున్నాడో కదా. ఈ మధ్య విశాల్‌ పొలిటికల్‌ ఎంట్రీ అంటూ బోలెడంత తతంగం జరిగింది. సడెన్‌గా పాలిటిక్స్‌లోకి ఎంట్రీ ఇచ్చి, అందరికీ షాక్‌ ఇచ్చాడు విశాల్‌. అయితే నామినేషన్‌ దాకా వెళ్లిన ఆయన పొలిటికల్‌ కెరీర్‌ అనూహ్యంగా వెనుదిరగాల్సి వచ్చింది. అనుకోని కారణాలతో విశాల్‌ నామినేషన్‌ ఆగిపోయింది. కాగా తర్వాత యధావిధిగా విశాల్‌ సినిమాల్లో బిజీ అయిపోయాడు. 

ఇటీవలే 'డిటెక్టివ్‌' సినిమాతో ప్రేక్షకుల ముందుకు వచ్చాడు. తమిళ హీరోనే అయినప్పటికీ, విశాల్‌కి తెలుగులో కూడా ఫాలోయింగ్‌ ఉంది. తెలుగులోనూ ఆయన సినిమాలకు మంచి ఆదరణ దక్కుతుంది. ఇకపోతే తాజా సినిమా 'అభిమన్యుడు' కాన్సెప్ట్‌ చాలా కొత్తగా ఉండబోతోందట. ఈ సినిమాని విశాల్‌ తన సొంత బ్యానర్‌లో నిర్మిస్తున్నాడు. విశాల్‌ ఫిల్మ్‌ ఫ్యాక్టరీ పతాకంపై ఈ సినిమా రూపొందుతోంది. ఈ సినిమాలో విశాల్‌ సరసన సమంత నటిస్తోంది. 

ప్రస్తుతం విశాల్‌ చేతిలో చాలా సినిమాలున్నాయి. ఈ సినిమాపై తమిళంతో పాటు, తెలుగులో కూడా భారీ అంచనాలున్నాయి. వచ్చే ఏడాది జనవరి 26న 'అభిమన్యుడు' సినిమాని ప్రేక్షకుల ముందుకు తీసుకొచ్చేందుకు సన్నాహాలు జరుగుతున్నాయి. మరో పక్క సమంత తెలుగులో 'రంగస్థలం' సినిమాలో నటిస్తోంది. చరణ్‌ హీరోగా సుకుమార్‌ దర్శకత్వంలో తెరకెక్కుతోందీ చిత్రం.