ఇటీవలే పవన్‌ కళ్యాణ్‌ 'కాటమరాయుడు' సినిమాతో ప్రేక్షకుల ముందుకొచ్చాడు. భారీ అంచనాలతో వచ్చిన ఈ సినిమా డివైడ్‌ టాక్‌తో ప్రచారం అయినా కానీ, వసూళ్ల విషయంలో దూసుకెళ్తోంది. ఇప్పటికే 45 కోట్లు వసూళ్లు సాధించింది ఈ సినిమా. తమిళ్‌ 'వీరమ్‌'కి రీమేక్‌గా తెరకెక్కింది ఈ సినిమా. అయితే నేశన్‌ డైరెక్షన్‌లో పవన్‌ కళ్యాణ్‌ ఓ సినిమా చేయాల్సి ఉంది. అది కూడా రీమేక్‌ సినిమానే. కొన్ని కారణాల వల్ల ఆ సినిమా ఆలస్యం అవుతోంది. కాగా పవన్‌ కళ్యాన్‌ లిస్టులోకి మరో సీనియర్‌ డైరెక్టర్‌ దూసుకొస్తున్నాడు. ఆయన మరెవరో కాదు. 'అఖిల్‌' సినిమాతో నిరాశ పరిచినా, మెగాస్టార్‌తో మెగా సంచలనం సృష్టించిన వి.వి.వినాయక్‌. వినాయక్‌ దర్శకత్వంలో పవన్‌ సినిమా చేయబోతున్నాడని తాజా సమాచారమ్‌. ఈ సినిమాని త్వరలోనే పట్టాలెక్కించనున్నారట. అయితే ప్రస్తుతం పవన్‌, త్రివిక్రమ్‌ కాంబినేషన్‌లో ఓ సినిమా తెరకెక్కుతోంది. ఈ సినిమాలో సాఫ్ట్‌వేర్‌ ఇంజనీర్‌ పాత్రలో నటిస్తున్నాడు పవన్‌ కళ్యాన్‌. ఈ సినిమా ఏప్రిల్‌ 6న సెట్స్‌ మీదికెళ్లనుంది. తొలి రోజు షూటింగ్‌కే ఓ పవర్‌ ఫుల్‌ ఫైట్‌ని చిత్రీకరించాలని సర్వం సిద్ధం చేశారట చిత్ర యూనిట్‌. వీలైనంత త్వరలోనే ఈ సినిమా షూటింగ్‌ కంప్లీట్‌ చేసి, దసరాకి సినిమాని విడుదల చేయాలన్నదే పవన్‌ ఆలోచన. అంటే ఈ సినిమా అయిన వెంటనే వినాయక్‌తో సినిమాని పట్టాలెక్కించేస్తాడట. అంటే ఈ సినిమా కూడా ఈ ఏడాదే ప్రేక్షకుల ముందుకొచ్చేస్తుందా? ఏమో పవన్‌ స్పీడు చూస్తుంటే అలాగే అనిపిస్తోంది.